Umutwe wa AFC/M23 kuri uyu wa Gatanu tariki ya 26 Ukuboza, yahanuye indege y’intambara yo mu bwoko bwa Sukhoi-25 y’Ingabo za Repubulika Iharanira Demokarasi ya Congo (FARDC).
Iyi ndege yahanuriwe mu gace ka Kigongo muri Teritwari ya Fizi, mu ntara ya Kivu y’Amajyepfo.
Amakuru avuga ko iriya ndege yarashwe mu gihe yari yiriwe igaba ibitero ku birindiro by’umutwe wa AFC/M23, birimo n’ibyagabwe mu mujyi wa Bukavu.
Amashusho yashyizwe ku mbuga nkoranyambaga yerekana ibisigazwa by’iriya ndege yaguye ku nkengero z’ikiyaga cya Tanganyika nyuma yo kuraswa.
M23 yarashe iriya Sukhoi-25, mu gihe amakuru avuga ko mu gitondo cyo kuri uyu wa Gatanu FARDC na yo yari yashoboye kurasa ubwato bubiri bwayo.
Imirwano kuri uyu wa Gatanu yiriwe isakiranya impande zombi mu duce twa Katongo na Kigongo two muri Teritwari ya Fizi.
