Wake wawili walioko katika ndoa na mwanaume mmoja walikimbizwa hospitalini katika eneo la Dakwa, Bwari Area Council, Abuja, baada ya kunywa dawa ya kiasili ya kuongeza hamu ya mapenzi inayojulikana kama “kayan mata”, wakilenga kumfurahisha mume wao ambaye alikuwa ameoa mke wa tatu hivi karibuni.
Kwa mujibu wa Daily Trust, wanawake hao walitumia dawa hiyo siku tatu baada ya mume wao, Musa Muhammad, kuoa mke mpya kutoka Gusau, jimbo la Zamfara. Kawaida walikuwa wakitumia dawa hiyo pamoja na maziwa au sukari, lakini mara hii walipewa kwa mfumo wa unga, tofauti na ilivyokuwa awali.
Musa alisema alipigiwa simu akiwa kwa mke wake mpya akaambiwa wake zake wawili hawajisikii vizuri. Alipofika nyumbani, aliwakuta wakilia na kupiga kelele kwa maumivu makali tumboni. Baada ya kushindwa kuwahudumia nyumbani hata kwa msaada wa muuguzi, walikimbizwa katika hospitali ya Madalla, ambako walifanyiwa upasuaji kutokana na uharibifu wa ndani ya miili yao.
Wake hao walikaa hospitalini kwa wiki moja na wakaruhusiwa kurudi nyumbani siku ya Jumatatu. Inaripotiwa kwamba walikuwa wamezoea kutumia dawa hiyo kutoka kwa mtaalamu wa mitishamba wa kike, lakini mara hii walitumia kwa njia tofauti.
Daktari Bingwa wa Wanawake, Dkt. Taiye Anifowose, alitoa onyo kwa wanawake kutotumia dawa za kiasili kama hizo, akisema zinaweza kuharibu viungo vya uzazi na kusababisha matatizo ya kudumu kiafya.
