Minisitiri w’u Bufaransa ushinzwe ubucuruzi mu mahanga no kubaka ubukungu, Franck Riester yabanje muri Uganda, mbere yo kugera mu Rwanda kuri uyu wa 26 Ukwakira 2021.
Muri Uganda, Riester yakiriwe na Perezida w’iki gihugu, Yoweri Museveni, amugezaho ubutumwa yahawe na mugenzi we w’u Bufaransa, Emmanuel Macron.
Perezida Museveni amaze kubitangariza ku rukuta rwa Twitter, agira ati: “Nahuye na Minisitiri w’u Bufaransa ushinzwe ubucuruzi mu mahanga n’ishoramari, Franck Riester wangejejeho ubutumwa bwa Nyakubahwa Emmanuel Macron. Yahamije ubushake bw’u Bufaransa mu kubana neza na Uganda n’inkunga yabwo mu mutekano, ubuhinzi n’ubworozi, ubuzima n’ubucuruzi bw’impande zombi.”
Minisitiri Riester ari kumwe n’itsinda ry’abahagarariye ibigo by’ishoramari n’ibishinzwe ubucuruzi. Nibagera mu Rwanda barakirwa n’abarimo Minisitiri w’Ubucuruzi n’Inganda, Habyarimana Béata baganire ku bufatanye bw’ibihugu byombi mu by’ubucuruzi.
