Rutahizamu Meddie Kagere ukinira ikipe y’igihugu ‘Amavubi’, yujuje ibitego bine muri shampiyona ya Tanzania nyuma yo gufasha ikipe ye ya Simba SC kunyagira JKT Tanzania ibitego 4-0.
Ni Kagere wamaze imikino ibiri ya shampiyona ya Tanzania adatsinda igitego, ahanini bitewe no kutagirirwa ikizere cyo kubanza mu kibuga n’umutoza Sven Ludwig Vandenbroeck.
Kwima umwanya Kagere byatumye abafana ba Simba bashyira igitutu kuri uriya mutoza ukomoka mu Bubiligi, birangira Kagere asubiranye umwanya mu bakinnyi babanza mu kibuga uhereye ku munsi wa gatatu wa Shampiyona.
Kuri iki cyumweru Meddie Kagere yatsinze ibitego bibiri muri bine ikipe ye yatsinze, ahita yuzuza ibitego bine mu mikino itanu ya shampiyona.
Umunota wa kane w’umukino wari uhagije kugira ngo MK14 afungure amazamu, ku mupira yaterekewe ku mutwe n’Umunya-Zambia Larry Bwalya ntazuyaze kuwutereka mu rucundura.
Undi munya-Zambia Clatous Chama yongeye guha Kagere umupira ku munota wa 40, atsindira ikipe ya Simba SC igitego cya gatatu.
Ni igitego cyaje gikurikira icya kabiri cyari cyatsinzwe ku munota wa gatandatu na Chris Mugalu.
Umunya-Mozambique Luis Miquissone ni we watsindiye Simba SC agashinguracumu ku munota wa 54 w’umukino.
Amanota atatu Simba yakuye mu mujyi wa Dodoma yayifashije kwisubiza umwanya wa kabiri ku rutonde rw’agateganyo rwa shampiyona n’amanota 13, inganya ya Young Africans ya gatatu.
Aya makipe yombi ararushwa amanota abiri na Azam FC yisubije umwanya wa mbere, nyuma yo gutsinda Kagera Sugar ibitego 4-2.
