Igisirikare cya Repubulika ya Demokarasi ya Congo kuri uyu wa Kabiri, itariki 17 Werurwe cyakajije ibitero ku nyeshyamba za Twirwaneho mu misozi miremire ya Minembwe, Teritwari ya Fizi, mu Ntara ya Kivu y’Amajyepfo. Ibi bitero bikoreshwamo drones byibasiye imidugudu ya Mikenke na Bidegu.
AFC/M23 irashinja igisirikare cya leta n’abafatanyabikorwa bacyo barimo Ingabo z’u Burundi n’imitwe ya wazalendo gutera amabombe mu bice bituwe cyane, bakomeza kurenga ku ihagarikwa ry’imiwano.
“Mu ijoro ryo kuwa 16 rishyira kuwa 17 Werurwe 2026, ihuriro ry’ingabo z’ubutegetsi bwa Kinshasa, zirimo FDNB, FDLR, abacanshuro n’imitwe ya wazalendo bagabye ibitero bya bombe hakoreshejwe drones z’ubwiyahuzi, byibasiye ibice bituwe cyane bya Mikenke, Bidegu no mu nkengero zaho muri Minembwe. Kuri iyi saha ibitero by’ubugizi bwa nabi birakomeje nta kuruhuka,” ibi ni ibyatangajwe na Lawrence Kanyuka, Umuvugizi wa AFC/M23.
Yongeyeho ko AFC/M23 itanga abagabo ku banyagihugu n’abanyamahanga kuri ibi bitero bikomeje kugabwa n’ubutegetsi bwa Kinshasa bukomeje kwibasira abasivili batagira kirengera mu bice bituwe cyane, harimo n’igitero giherutse kugabwa I Goma u itariki 11 Werurwe 2026.
Iri huriro rishinja Umuryango Mpuzamahanga gukomeza guceceka ku bwicanyi bukomeje kwibasira abasivili bo mu Minembwek uva mu myaka myinshi ishize, ryongeraho ko amaraso y’Abanyekongo ubutegetsi bukomeje kumena buzayabazwa.
Indi mirwano yavuzwe mu kibaya cya Ruzizi, ahumvikanye urusaku rw’amabombe n’amasasu guhera mu gitondo cyo kuri uyu wa Kabiri ahagana Kabunambo, bituma abasivili benshi bahunga.
