Abaturage bo mu tugari twa Cyabagarura mu murenge was Musanze na Rwebeya mu murenge wa Cyuve barasaba inzego zibishinzwe kubakemurira ikibazo cy’ikiraro cyabahuzaga kikaba cyarangijwe n’imvura yaguye mu i tumba.
Iki kiraro kizwi nk’icyo ku kibuga cy’indege kiri ku mugezi wa Rwebeya aho cyakoraga ku midugudu ibiri (2) ariyo Mubuga wo mu kagari ka Rwebeya, umurenge wa Cyuve n’umudugudu wa Kageyo mu kagari ka Cyabagarura, umurenge wa Musanze hose ho mu karere ka Musanze.
Bamwe mu baturage baganiriye na Bwiza.com harimo abanyeshuri biga ku bigo by’amashuri bitandukanye biri hakurya y’iki kiraro birimo Urwunge rw’amashuri rwa Cyabagarura, ikigo cy’amashuri abanza cya Gahondogo, ishuri ry’inshuke rya Cyabagarura ndetse n’ishuri ry’imyuga ry’abihayimana rizwi na ETEFOP no hakuno yacyo habarizwa ikigo cy’amashuri abanza cya Gashangiro II, Urwunge rw’amashuri rwa GSK ( Groupe Scolaire de Kigombe), ikigo cya Amitié , Wisdom School , New Hope n’andi menshi harimo n’insengero zitandukanye.
Nyiramana Solange ni umwe mu banyeshuri biga mu rwunge rw’amashuri rwa Cyabagarura. Yabwiye Bwiza.com ko abanyeshuri bahangayikishijwe no kuzenguruka bajya ku ishuri bikabaviramo no gukererwa amasomo.
Agira ati ” Ntuye mu murenge wa Cyuve mu kagari ka Kabeza ariko nkiga ku rwunge rw’amashuri rwa Cyabagarura ariko nkaba niga ntaha kandi iki kiraro cya Rwebeya nicyo twanyuragaho, tuva cyangwa tujya ku ishuri ariko nyuma yuko gitwawe n’amazi dusigaye tuzenguruka, bikatuviramo gukererwa amasomo kubera ko urugendo rwabaye rirerure, bit yo tugasaba ubuyobozi ko bwagikora , tukaruhuka imvune dusigaye duhura nayo.”
Bizimungu Jean de Dieu umuyobozi w’ishuri ry’inshuke rya Cyabagarura akaba avuga ko gusenyuka kw’iki kiraro cya Rwebeya bibahangayikishije cyane kuko bishobora kuzateza impanuka kuko abatazengurutse bagerageaza gusimbuka cyangwa bagaca mu mazi hasi aho bashobora gutwarwa n’ayo mazi aturuka mu ishyamba ry’ibirunga.
Agira ati ” Dufite abana bato biga ku ishuri ry’inshuke rya Cyabagarura kandi abenshi banyuraga kuri iki kiraro. Natwe ubwacu niho twanyuraga ariko nyuma yuko gitwawe n’amazi, dusigaye tuzenguruka cyangwa abashoboye bagasimbuka. Gusa abana bo ntibabishobora uretse kuzenguruka. Turifuza ko cyakorwa vuba ubuzima bugakomeza.”
Umuyobozi w’akarere ka Musanze Ramuri Janvier yabwiye Bwiza.com ko ikibazo bagiye kugikemura mu maguru mashya, cyane ko ngo ubuyobozi butarebera ikibazo nka kiriya gishobora kugira ingaruka zikomeye ku buzima bw’abaturage by’umwihariko abana bato bajya kwiga ku bigo by’amashuri bitandukanye biri hakurya no hakuno y’iki kiraro.
Yagize ati ” Nibyo icyo kiraro cyarangiritse koko kubera amazi y’imvura ariko dufatanije n’imirenge ibiri ikora kuri icyo kiraro, tugiye kuhashakira igisubizo mu maguru mashya, dushyiraho ibiti bikomeye mu buryo bw’agateganyo mu gihe tugitegereje ko cyakubakwa mu buryo burambye.
Uyu muyobozi yasabye abaturage cyane cyane abanyeshuri bakoreshaga iki kiraro kureka ibikorwa bibi batangiye byo gusimbuka kuko umuntu ashobora gusimbuka harimo amazi akamutwara cyangwa se akahavunikira cyane ko ngo batangiye kuhashakira igisubizo kirambye mu gihe kitarambiranye.
Nubwo bimeze gutya ariko, nkuko bamwe mu baturage babitangarije Bwiza.com, ngo mu myaka itanu ishize, uyu mugezi wa Rwebeya wari washyizwe muri gahunda yo gutunganywa ndetse imwe mu miryango iwuturiye ikahimurwa harimo n’igice kimwe cy’ishuri rya Wisdom.
Aha ni naho bagombaga guhera himurwa Bizimungu Jean de Dieu, Nyiramashashi Elie, Nyiranzoga Siperansiya, uwitwa Thomas ndetse n’igice kimwe cy’ikigo cya Wisdom School ariko birangira bidakozwe ahubwo hakorwa igice cy’epfo y’umuhanda Musanze-Rubavu.
Byari biteganijwe ko hagombaga kubakwa ibiraro bine , ikiraro cyo ku kibuga cy’indege ari cyo cyacitse kikaba kinahangayikishije abaturage, ikiraro kizwi nko kwa Thomas, ikiraro Kiri inyuma y’ishuri rya Wisdom ndetse n’ikiraro kizwi nk’icyo kwa Dominiko.
SETORA Janvier
