Mu nama yahuzaga abayobozi b’inzego z’ibanze mu karere ka Musanze kuva ku rwego rw’akagari kugeza ku rw’akarere, umuyobozi w’akarere, Habyarimana Jean Damascene yahwituriye mu ruhame bamwe mu banyamabanga Nshingwabikorwa b’utugari bavugwaho imyitwarire idahwitse.
Muri iyi nama yabaye ku wa Mbere tariki ya 2 Mata 2018, Yafatiwemo imyanzuro itandukanye irimo n’iyo kwegera abayobozi mu tugari, bagakosora imikorere mu gihe hari bamwe baba banengwa n’abaturage.
Meya Habyarimana yagiye ahagurutsa bamwe mu banyamabanga Nshingwabikorwa b’utugari mu ruhame, bakisobanura ku byo bavugwaho, bijyanye na ruswa, kurya ibyagenewe abaturage ndetse n’abataboneka ku kazi, by’umwihariko yihanangiriza n’abasinda.
Ati “Executive wa Bisoke muri Kinigi [Zirimwabagabo Alphonse] nahaguruke turebe, ntabwo ari wowe wagiye gutanga amabati mu kagari katari akawe,… Ariko muranyumvira kweli! Umuntu aratabaje ati ‘abaturage bahuye n’ibiza’ tumuhaye abamati ngo ajye kuyafasha abaturage bahuye n’ibiza arangije ajya kuyaha inshuti ze”.
Yahise ahagurutsa n’uw’akagari ka Bumara [Hagumimana Slyvere] agira ati “Executive wa Bumara ari hehe, eh eh eh haguruka, ngwino hano, ihute cyane, niyo mpamvu wagiye kwicara kure, ngaho bwira aba bantu bagenzi bawe amafaranga y’abaturage wariye, ni angahe? [ arasubiza : Ibihumbi 200], hashize igihe kingana iki uyariye,…
Umwe mu bari aho ashimangira ibyo meya yari amaze kuvuga, ko gitifu w’akagari ba Bumara, Hagumimana Slyvere afite imikorere mibi.
Ati “Nibyo koko gitifu wa Bumara arangwa n’imikorere mibi, aho yafashe amafaranga y’umuturage angana na 204,100 arayarya, iyo bijya kugera kuri iyi ntera, ni uko baba barahwituwe, baranandikiwe”.
Meya arasobanura ko nta kuntu uyu muyobozi yaba yarariye amafaranga y’abaturage bakaba barimo kumwishyuza, ngo nawe asubire inyuma abashe kubakemurira ibibazo, ati “yakora amakosa ukamuhana? Uzishyuriza abandi nawe barimo kukwishyuza?
Meya Habyarimana akomeza avuga ko hari abanyamabanga Nshingwabikorwa bimuriye ibiro mu kabari, birirwa mu bubari basinze aho gukemurira abaturage ibibazo.
Ati “Gitifu bite se? urahembwa nywera amafaranga yawe, ibyo kubwira abantu ngo shyira amafaranga kwa naka, ngo bagende bishyure kwa naka,… wowe uranyumva ariko, wowe nta soni ufite, abaturage baratabaza, wowe uramubwira ngo niyishyure kwa naka agahita ampamagara, kora akazi cyangwa umbwire niba kakunaniye, abaturage barahamagara bati ‘uyu muntu mwamudukijije’ ko yirirwa yasinze”.
Mu bihanangirijwe hagaragayemo n’abagore, akababaza icyaba cyarabaye mu gihe bari basanzwe bafatwa nka ba mutima b’urugo.
Ati “Abadamu ko bahoze ari inyangamugayo byakugendekeye gute, ibintu by’amashyamba wirirwa utema, uyatemaguza utagiyeyo, wumva barimo gutema ahangana hate? Abaturage bakaba bavuga ko batema no mu kwabo, kuki mukorera mu biro, ibyangombwa wirirwa utanga ngo bateme amashyamba uba wageze aho ari?
Executive wo muri Nkotsi akagari ka Bikara [yitwa Nambajimana Philomene], uriya mudamu ntabwo akora, n’umunsi twararagayo irondo nabwo twaragushakishije turakubura, nta gitifu ugomba kurara ahandi, bagomba kurara mu tugari twabo, ni ikibazo gikomeye”.
Abitabiriye iyi nama batangaje ko hari byinshi bungutse bagiye gukemura, umwe muri bo ati “habayeho kudukebura, tugiye gushyira imbaraga mu byo twagiye tunengwaho byose”.
Iyi nama yasojwe hemejwe ko abayobozi mu nzego z’akarere bagiye gufatanya n’ab’imirenge, bakarushaho kumanuka bakegera abayobozi mu tugari kugira ngo barusheho kunoza imikorere.
Kanda kuri SUBSCRIBE ujye ubona ibiganiro n’indirimbo bishya
