Umurundi Mvuyekure Emmanuel ‘Manu’ ukinira Rayon Sports, yasabye imbabazi abarimo umusifuzi Ishimwe Claude ‘Cucuri’ nyuma yo kumukubita umupira mu gatuza.
Kuri uyu wa Gatatu Rayon Sports yari yakiriye Etoile de l’Est kuri Kigali Pele Stadium, mu mukino w’umunsi wa gatandatu wa shampiyona warangiye iyitsinze ibitego 2-1.
Ni ibitego byombi byatsinzwe n’Umugande Musa Esenu.
Rayon Sports yarangije uyu mukino ifite abakinnyi 10 bonyine mu kibuga, nyuma y’uko Manu yari yeretswe ikarita itukura.
Umukino ubwo wari ugeze ku munota wa 64 w’umukino uyu Murundi yakoreweho ikosa, afata umupira ari na ko aburanya umusifuzi Ishimwe Claude wahise amwereka ikarita y’umuhondo.
Uyu Murundi n’umujinya w’umuranduranzuzi yahise akubita umupira yari agicikatiye mu gatuza ka Cucuri; undi na we ahita amwereka ikarita itukura.
Manu mu butumwa yanyujije ahandikwa Story ku rubuga rwa Instagram, yasabye imbabazi kubera imyitwarire yanenzwe n’abatari bake yagaragaje.
Ati: “Ni yo karita y’umutuku ya mbere neretswe kuva natangira gukina. Sinari ngambiriye gukubita umupira umusifuzi. Mbere na mbere nagira ngo ngusabe imbabazi wowe Cucuri, Ndakubaha cyane, abafana ba Rayon Sports, bakinnyi bagenzi banjye, FERWAFA. Urukundo rumwe. Tworoherane Cucuri.”
Manu yasabye imbabazi mu gihe abakunzi b’umupira w’amaguru bakomeje kotsa igitutu FERWAFA, basaba ko uriya mukinnyi yafatirwa ibihano.
