Abaturage bo muri Nigeria bari bagiye gutora Umukuru w’Igihugu kuri uyu wa 25 Gashyantare 2023 bishe umuseseri wa komisiyo y’igihugu y’amatora wakoraga uburiganya bw’amajwi.
Ikinyamakuru Sahara Reporters gisobanura ko aba baturage bakoreye urugomo mu mujyi wa Abuja, nyuma yo gusanga uyu museseri yifungiranye mu cyumba wenyine, atora umukandida uhagarariye ishyaka APC, Bola Tinubu, ku mpapuro zose z’itora zari ku ishuri ribanza rya LEA.
Ngo mbere y’uko uyu museseri afatwa, abatora bategereje amasaha menshi babwirwa ko impapuro z’itora zidahari, bityo bazitegereza bihanganye, na bo barabyemera.
Bagitegereje, baje gutahura ko umuseseri ari kwifashisha za mpapuro zose atora Bola Tinubu, bamusanga mu cyumba yari yifungiranyemo, baramusohora, baramuhondagura, bamugira intere, bimuviramo urupfu.
Abakandida 18 ni bo bari ku rutonde rw’itora. Kugeza kuri uyu wa 26 Gashyantare ntabwo haramenyekana iby’agateganyo byavuyemo.
