Leta ya Norway yatangaje ko kuwa Kabiri tariki ya 5 Kamena 2018 yataye muri yombi umugabo w’Umunyarwanda uri mu kigero cy’imyaka 50 y’amavuko ukurikirwanyweho ibyaha byo kugira uruhare muri Jenoside yakorewe Abatutsi mu 1994.
Urwego rushinzwe iperereza muri kiriya gihugu rwa “Kripos” rwatangaje mu itangazo rwashyize ahagaragara ko uyu mugabo utahise atangarizwa amazina yafatiwe mu mujyi wa Nordland, urukiko rwa ho rukaba rwahise rusaba ko afungwa by’agateganyo mu gihe cy’ukwezi ariko mu byumweru 2 bya mbere akazaba nta muntu umugeraho ngo abe yamusura.
Itangazo urwego rwa Kripos rwashyize hanze rigira riti “hari impamvu ifatika yo gukeka ko uyu mugabo yaba yaragize uruhare mu kwica abantu benshi, cyane cyane b’Abatutsi.”
Uyu mugabo yageze muri Norway mu 2006 nk’impunzi, aza kubona ubwenegihugu bwa Norway mu 2014. Umushinjacyaha Espen Hanken yatangaje muri 2017 polisi ya kiriya gihugu yakoze ingendo 3 mu Rwanda mu rwego rwo kwikorera iperereza, ndetse igahura n’abatangabuhamya batandukanye ibi bikaba byaratumye barushaho kumukeka.
Gusa ngo icyemezo cyo guta muri yombi uyu mugabo cyashingiyeahanini ku makuru yatanzwe n’u Rwanda n’ingenzo z’iperereza (investigative trips) bikoreye mu Rwanda, gusa ngo iperereza rirakomeje.
