Perezida mushya wa Repubulika Yunze Ubumwe ya Tanzania, Samia Suluhu Hassan, kuri uyu wa 6 Mata 2021 yagaragaje ko agiye gukora amavugurura mu rwego rwo kurwanya icyorezo cya Covid-19.
Ni nyuma y’igihe gikabakaba umwaka Leta ya Tanzania imaze nta ngamba cyangwa amabwiriza ishyiraho byo kwirinda iki cyorezo cyibasiye Isi kuva mu mpera z’umwaka w’2019.
Perezida Suluhu mu ijambo yatambukije kuri televiziyo y’igihugu, yavuze ko mu rwego rwo kumenya uko ubwandu bwa Covid-19 buhagaze muri Tanzania, agiye gushyiraho itsinda ry’impuguke rizabikoraho ubushakashatsi, bukazashingirwaho mu gushyiraho ingamba n’amabwiriza mashya.
Yagize ati: “Ku kibazo cya Covid-19, ndumva nashyiraho komite y’impuguke zizabigenzura mu buryo bwa kinyamwunga, hanyuma zikagira inama Leta. Ntabwo [Tanzania] yakwemera buri cyose kivuye hanze ariko na none byose ntiyabyanga.”
Ku kijyanye no kuba Tanzania yajya muri Guma mu Rugo bitewe n’urwego ubwandu bwa Covid-19 bwaba buriho, Perezida Suluhu yavuze ati “Ntabwo twakwishyira mu kato nk’aho turi Ikirwa”.
Yongereyeho ko igihugu cye kitagomba kugendera kuri raporo zitangazwa n’abo hanze nk’aho cyo kitakwikorera raporo y’uko iki cyorezo gihagaze. Yagize ati: “Tanzania igomba kwimenyera aho duhagaze ku kibazo cya Covid-19.”
Imibare ya Covid-19 muri Tanzania iheruka kujya hanze muri Mata 2020 ubwo hari hamaze kwandura 509. Byageze muri Kamena 2020, Dr John Pombe Magufuli wayoboraga iki gihugu yerura avuga ko iki cyorezo kitakiriyo, asaba abaturage gukora ibikorwa byabo ntacyo bikanga.
Tariki ya 19 Gashyantare ubwo yari ku muhango wo gusezera bwa nyuma kuri nyakwigendera Amb. John Kijazi, Dr Magufuli yaciye amarenga ko iki cyorezo cyaba ari cyo cyamuhitanye, asaba ko mu gihugu hose haba amasengesho y’iminsi itatu yo gusaba Imana ko yakibakiza.
Kurikira ibiganiro n’amavidewo binyura kuri Bwiza TV
