Minisitiri w’Intebe wa Pologne, Donald Tusk yatangaje ko igihugu cye kitazigera cyihanganira indege cyangwa ibindi bikoresho by’igisirikare by’Uburusiya byinjira mu kirere cya Pologne nta burenganzira.
“Ibi ndabivuga mu buryo bweruye: tuzafata umwanzuro wo kurasa ikintu cyose cy’indege kizinjira ku butaka bwa Pologne, nta biganiro cyangwa kuganira bizabaho. Nta mwanya wo kujya impaka kuri byo.” Tusk yabivuze kuri uyu wa Mbere mu kiganiro n’abanyamakuru.
Ibi bikurikiye ibihe bise iby’ubwirasi by’ingabo z’Uburusiya, aho indege nini n’indege zitagira abapilote (drones) zimaze kwinjira mu kirere cy’ibihugu bya NATO, birimo Romania, Estonia ndetse na Pologne.
Ku wa Gatanu w’icyumweru gishize, indege eshatu z’intambara za MIG-31 z’Uburusiya zari hejuru y’Inyanja ya Baltique zinjiye mu kirere cya Estonia maze zimara iminota 12 zitarasohoka, bituma NATO ihita yohereza indege zo kuzihagarika.
Estonia yatangaje ko iki gikorwa ari “agasuzuguro kadasanzwe,” aho Minisitiri w’Intebe Kristen Michal yavuze ko igihugu cye gishobora gusaba NATO gukoresha Icyemezo cya 4 cy’iri shyirahamwe, giteganya ibiganiro byihutirwa mu gihe umutekano w’igihugu cya NATO usagariye.
Ku ruhande rwe, Minisitiri w’Ububanyi n’Amahanga w’iki gihugu, Margus Tsahkna yavuze ko Ambasaderi w’Uburusiya yahise asabwa ibisobanuro. Yagize ati: “Uburusiya bumaze kuvogera ikirere cya Estonia inshuro enye muri uyu mwaka. Ariko ibyabaye ku wa Gatanu, aho indege eshatu zinjiye icyarimwe, ni ibintu by’ikirenga. Ni ibintu bigomba guhabwa igisubizo gikomeye cya politiki n’ubukungu.”
Donald Tusk we yavuze ko ashaka “kuba afite 100% y’icyizere” ko ibihugu byose bya NATO bizafatanya mu kurengera ubusugire bwa Pologne, kugira ngo “mu gihe umutekano waba utangiye guhungabanywa , Pologne itazasigara yonyine.”
