Radiyo RPA (Radio Publique Africaine) iyobowe na Bob Rugurika uri mu bahunze u Burundi bakekwaho uruhare mu kugerageza guhirika Pierre Nkurunziza ku butegetsi muri Gicurasi 2015, kuri uyu wa 12 Mata 2021 yongeye gukora.
Ni nyuma y’aho tariki ya 24 Werurwe 2021, Bob Rugurika, Innocent Muhozi wa Télé-Renaissance na Alexandre Niyungeko uyoboye Radiyo Inzamba Agateka Kawe (RIAK) bamenyesheje abakurikira ibi bitangazamakuru bivugwa ko bikorera mu Rwanda ko bibaye bihagaritse gukora, by’agateganyo.
Bob Rugurika wa RPA yavuganye na Radiyo Ijwi rya Amerika (VOA) ubwo hari hamaze gusohoka iri tangazo, yavuze ko iki cyemezo batagifashe ku bushake, ko ahubwo Leta y’u Burundi ikomeje kuniga ubwisanzurre bw’ibitangazamakuru biri imbere mu gihugu, igakurikirana n’ibiri mu mahanga.
Inkuru irambuye ku ifungwa ry’ibi bitangazamakuru https://bwiza.com/?Ibitangazamakuru-by-abakekwaho-kugerageza-guhirika-Nkurunziza-byahagaritse
Ubwo RPA yongeraga gukora nk’uko bigaragara ku mbuga nkoranyambaga zayo, yatangiranye n’inkuru zirimo iya dosiye y’urupfu rwa Ernest Manirumva wari impirimbanyi mu kurwanya ruswa, wishwe muri Mata 2009.
Ku rubuga rwa Twitter, RPA yagize iti: “Amakuru ya RPA yo kuri uwu wa 12 Mata 2021 arimo ibijyanye na dosiye y’iyicwa rya Ernest Manirumva, imiti iva mu Burundi yaba ihabwa imitwe y’iterabwoba, ubwicanyi bukomeza mu gihugu, n’ibindi.”
Kugeza ubu ntabwo Télé-Renaissance na RIAK zo zirongera gukora.
Kurikira ibiganiro n’amavidewo binyura kuri Bwiza TV
