Rais wa Sudan Kusini, Salva Kiir, amemfuta kazi Mkuu wa Jeshi la nchi hiyo baada ya miezi saba tu tangu kumteua, na amemteua mrithi wake mpya, kwa mujibu wa redio ya taifa.
Hakuna sababu yoyote rasmi iliyotolewa kuhusu kuondolewa kwa Jenerali Paul Nang Majok, ambaye alikuwa katika nafasi hiyo tangu Desemba, kulingana na tangazo la Jumatatu usiku.
Tangazo hilo lilisema kuwa Rais Kiir amemteua Dau Aturjong kuwa mkuu mpya wa majeshi. Gen. Majok alikuwa akiongoza jeshi wakati wa mapigano makali dhidi ya waasi wa White Army, kikundi chenye vijana kutoka kabila la Nuer, ambacho kimezua tena mzozo wa kisiasa nchini humo.
Msemaji wa jeshi, Lul Ruai Koang, alisema:
“Ni utamaduni wetu kwamba mtu anapoteuliwa au kuondolewa, hakuna sababu inayotolewa. Ni jambo la kawaida.”
Sudan Kusini imekuwa na hali ya utulivu tangu makubaliano ya amani ya 2018 yaliyomaliza vita vya miaka mitano vilivyosababisha vifo vya maelfu, lakini machafuko ya kikabila yanaendelea kuongezeka.
Mnamo Machi, Makamu wa Kwanza wa Rais Riek Machar alizuiliwa kwa muda, hali iliyozua hofu ya kurudi kwa migogoro.
Waziri wa Habari, Michael Makuei, alisema kuwa hatua hiyo ilichukuliwa kwa sababu Machar alikuwa ameanza kuhamasisha wafuasi wake na:
“kuwashawishi waasi dhidi ya serikali ili kuvuruga amani na kuzuia uchaguzi, na kuirudisha Sudan Kusini vitani.”
Chama cha Machar kilikanusha tuhuma hizo, kikisema hakina uhusiano wowote na waasi wa White Army, waliopambana na jeshi la serikali katika mji wa Nasir kaskazini-mashariki mwa nchi mnamo Machi.
Mnamo Mei, jeshi la Sudan Kusini lilitangaza kuwa limerejesha mji wa Nasir mikononi mwa serikali kutoka kwa waasi wa White Army.
