Sosiyete sivile muri Moba, mu Ntara ya Tanganyika, muri Repubulika ya Demokarasi ya Congo, iramagana “ingamba zidakunzwe” zo kubuza abaturage gukora no kurya isombe zafashwe n’inyeshyamba zivugwaho kuba mu ihuriro rya Wazalendo.
Nk’uko iyi sosiyete sivile ivuga, aba barwanyi babujije abaturage bo muri Sheferi ya Kansabala gukora no kutarya isombe buri wa Kane.
Nk’uko byatangajwe na Leon Tabu Pesa, umuvugizi wa sosiyete sivile ya Moba, ngo iki cyemezo nticyemewe kubera ko abaturage bagomba kwisanzura mu mirimo yabo.
Arasaba rero abayobozi kugira icyo bakora kugira ngo ihungabana ry’uburenganzira bwa muntu rirangire.
Ati: “Hariho ingamba zashyizweho n’ingabo zo kwirwanaho muri Sheferi ya Kansabala muri gurupoma zimwe amwe no mu midugudu imwe n’imwe nka Kampinda, Muhusi, Kidumu zo kudakora buri wa Kane kandi ko ntawe ugomba kurya isombe hano iwacu, muri rusange bita sombe hano murugo. Nk’umuhuzabikorwa wa sosiyete sivile rero twamaganye cyane iki cyemezo. ”
Yibukije ko mbere, ingamba zimwe na zimwe nk’izi zashyizweho n’abayobozi gakondo ku mihango y’abasekuruza ariko kuri ubu nta mpamvu n’imwe ishobora kwemeza ko izo ngamba zubahirizwa.
Leon Tabu Pesa ati: “Umuntu wese utubahirije iki cyemezo, arimo gucibwa amande cyangwa agakorerwe iyicarubozo. Barahambira abantu kandi bakubita umuntu wese utubaha iki cyemezo. Guverinoma ni yo igomba gushyiraho ingamba, kugira ngo tureke abaturage bakomeze ubucuruzi bwabo mu bwisanzure, cyane cyane ko turi mu gihe cy’ihinga, duhinga kuva ku wa mbere kugeza ku cyumweru iyo tubishaka. ”
Umuyobozi wa Teritwari ya Moba aratangaza ko hamaze gufatwa ingamba zo guhangana n’akavuyo kari guterwa n’abo yise ko batubaha amategeko.
Ku ruhande rwe, umuvugizi wa FARDC mu Ntara ya Tanganyika avuga ko igisirikare kitazi umutwe uwo ari wo wose w’inyeshyamba muri iyi ntara.
