Abari mu myiyerekano mu Burasirazuba bwa Republika Iharanira Demokarasi ya Congo, bafunze imihanda mu mijyi ya Goma, Butembo na Beni, bababajwe n’uko amatora yasubitswe.
Amatora yo yagombaga kuba ku wa 23 Ukuboza, arasubikwa ashyirwa ku wa 30 Ukuboza 2018, by’umwihariko bamwe bakazatora mu mwaka utaha.
Martin Fayulu, umwe mu bakomeye batavuga rumwe na Leta, yatangaje ko aya matora ashobora gukurura imvururu zikomeye.
Nk’uko BBC ibitangaza, ngo kwimura amatora mu bice bimwe akazakorwa mu kwa Gatatu, ari ibintu byagizwe nkana kugira bagabanye abamushyigikiye.
Perezida Joseph Kabila yagombaga kuva ku butegetsi mu 2016, yongererwa imyaka ibiri kugira ngo abanze ategure amatora y’uzamusimbura, bamwe mu batavuga rumwe na we bakaba bakomeje kuyasesenguramo agakino, hagamijwe gukomeza kuyigiza inyuma.
Ku wa 23 Ukuboza 2018, amatora yasubitswe bitewe n’inkongi y’umuriro yafashe ku bubiko bwa Komisiyo yigenga ishinzwe amatora (CENI), zimwe mu mashini zagombaga gukoreshwa mu matora n’ibindi byari kwifashishwa birashya birakongoka.
