Umuvugizi w’ingabo za Repubulika ya Demukarasi ya Congo, FARDC, mu Ntara ya Kivu y’Amajyepfo, Capt. Dieudonné Kasereka yatangaje ko ingabo z’u Burundi zabiciye abasirikare babiri mu mirwano yabereye mu kiyaga cya Tanganyika.
Iyi mirwano yabereye mu gace ka Minango mu ntara ya Rumonge mu masaaa munani y’urukerera rwo ku wa 7 Nzeri 2021, ubwo ingabo z’u Burundi zikangaga ko aba basirikare ba RDC bane bari mu bwato buto, baba ari abagizi ba nabi.
Ingabo z’u Burundi zatangaje ko zarasanye nabo zizi ko ari abagizi ba nabi, zicamo babiri, abandi babiri bararohama bishwe n’amazi, zifata intwaro zabo ebyiri, bombe imwe n’imbunda iyirasa, amavuta na moteri y’ubwato.
Capt. Kasereka yasobanuriye AFP ko batari abagizi ba nabi, ahubwo bari abasirikare babo bari ku burinzi muri iki kiyaga gihuza ibihugu byombi. Yagize ati: “Imirwano yabaye bitewe no kubura itumanaho, ariko na none biterwa n’umwijima wari mu kiyaga. Ingabo za Congo zirwanira mu mazi zari ku burinzi, iz’u Burundi zizitiranya n’amabandi.”
Uyu musirikare ati: “Abasirikare ba Congo babiri bapfuye, undi arafatwa nyuma y’imirwano hagati y’ingabo za Congo zirwanira mu mazi n’iz’u Burundi mu ijoro ryo ku wa Mbere rishyira uwa Kabiri mu kiyaga cya Tanganyika gihuza ibihugu bombi.”
Bivugwa ko mbere y’uko haba iyi mirwano, abasirikare ba RDC babanje kwambura abarobyi b’Abarundi amavuta yo gushyira mu bwato. Ubwo ngo ni bwo batabaje bavuga ko ari abagizi ba nabi, ab’u Burundi baza batabara, bararasana.
