Kuri uyu wa Gatatu, itariki ya 14 Nzeri 2022, abantu 5 barimo abarwanyi 4 ba ADF n’umusirikare w’ipeti rya Lt. Colonel wa FARDC bapfiriye mu mirwano yabereye ku muhanda wa Mbau-Kamango, muri Teritwari ya Beni muri Kivu y’Amajyaruguru .
Nk’uko byatangajwe na Capt. Anthony Mwalushayi, Umuvugizi w’ibikorwa bya Sukola 1, ngo umusirikare mukuru wa FARDC wishwe ni Lt. Col. Mbonza Lucien.
Yari ashinzwe ibikoresho muri Regiment ya 3402 ya FARDC. Uyu akaba yapfuye ava I Beni ubwo yagwaga mu mutego w’inyeshyamba nk’uko iyi nkuru dukesha Mediacongo.net ivuga.
Capt. Mwalushayi ati “ADF yateze igico abasirikare ba FARDC. Nyuma yo kurasana hagati y’ingabo za leta n’abaterawoba ba ADF, raporo ivuga ku ruhande rw’ingabo, ofisiye wishwe, witwa Lt. Col. Mbonza Lucien, ushinzwe ibikoresho muri Regiment ya 3402. Ku ruhande rw’abaterabwoba ba ADF, abasirikare ba FARDC babashije kwica abaterabwoba 4 ba ADF, no gufata intwaro y’intambara. Icyakora, abarinzi ba Lt. Col. Mbonza Lucien batewe inkunga n’imitwe ikorera muri ako gace kandi bakurikirana umwanzi berekeza muri parike y’igihugu ya Virunga, ”
Iyi nkuru isoza ivuga ko kuwa Kabiri ushize, itariki ya 13 Nzeri 2022, abandi bantu babiri bishwe na ADF, mu gico muri uyu muhanda. Usibye impfu, hangijwe n’ibintu.
