Ishyirahamwe ry’Umupira w’Amaguru ku Mugabane w’u Burayi, UEFA ryashyize ahagaragara urutonde rushya rw’amanota y’amakipe akomeye ku mugabane, hashingiwe ku mikino y’imyaka itanu ishize.
Real Madrid, ifite ibikombe bya Champions League 15 mu mateka yayo, ikomeje kuba ku isonga n’amanota 117.500, ikurikiwe na Bayern Munich ifite amanota 108.250 na Inter Milan ifite 107.250.
Uyu mwanya wa mbere wa Real Madrid wubakiye ku ntsinzi zikomeye mu myaka itanu ishize, harimo amanota 34.000 mu mwaka wa 2023/24, ndetse n’ubwo yasezerewe na Arsenal muri 1/4 cya Champions League umwaka ushize, ntibyigeze bigabanya ubudahangarwa bwayo.
Liverpool iri ku mwanya wa gatanu n’amanota 101.500 nyuma y’imyaka myiza mu marushanwa y’i Burayi no mu gihugu imbere. Manchester United iri ku mwanya wa 13, Chelsea ku wa 14, naho Arsenal, yari yasezereye Real Madrid umwaka ushize, iri ku mwanya wa 15.
Barcelona, ikipe yo muri Espagne ifite amateka akomeye, iri ku mwanya wa 9 n’amanota 83.250, ikaba yagaragaje kuzamuka nyuma y’imyaka y’imikino idahagaze neza.
Uru rutonde rwa UEFA ruterwa n’amanota akusanywa mu myaka itanu, aho ikipe ihabwa amanota bitewe n’intsinzi, kunganya, kugera mu byiciro bya nyuma, ndetse n’amanota y’inyongera ku makipe agera muri 1/2 cy’irangiza cyangwa ku mukino wa nyuma.
