Inama y’ubutegetsi ya Real Madrid yo muri Espagne yafashe icyemezo cy’uko iyi kipe izakurikiranira hafi urubanza rw’ibirego mukeba wayo, FC Barcelona, babiri babaye ba Perezida bayo (Josep María Bartomeu na Sandro Rosell), Albert Soler na Óscar Grau babayemo abayobozi, bakurikiranweho n’ubushinjacyaha bwo mu mujyi wa Barcelona, intara ya Cataluña.
Ku wa 10 Werurwe 2023, ibiro by’ubushinjacyaha bwo muri Barcelona byatangaje ko byatanze ikirego nyuma yo gusanga FC Barcelona ishobora kuba yarahaye ruswa ikigo cy’abasifuzi kiyobowe na José María Enríquez Negreira wabaye Visi Perezida wa komite y’abasifuzi kuva mu mwaka w’1993 kugeza mu w’2018.
Ubu bushinjacyaha buvuga ko FC Barcelona yaba yarishyuye iki kigo miliyoni 7.3 z’amayero hagati y’umwaka w’2001 n’2018 kugira ngo Negreira nk’uwari Visi Perezida w’abasifuzi, ajye agira uruhare rukomeye mu kugena uko imikino y’iyi kipe igomba kurangira.
Real Madrid kuri uyu wa 12 Werurwe 2023 yatangaje inama y’ubutegetsi yayo yakoze inama, yiga kuri iyi ngingo, yanzura ko iyi kipe izitabira urubanza rwa FC Barcelona n’Ubushinjacyaha, mu gihe ruzaba rutangiye.
Yagize iti: “Real Madrid iragaragaza ko ihangayikishijwe cyane n’uburemere bw’ibyabaye kandi yongeye gushimangira ko yizeye byimazeyo ubutabera, ikanemera ko mu rwego rwo kurengera inyungu yemererwa n’amategeko, izitabira [urubanza], umucamanza namara kugururira impande zagizweho ingaruka.”
Nyuma y’itangazo rya Real Madrid, Perezida wa FC Barcelona uri muri iyi nshingano ubu, Joan Laporta, yasabye abakunzi b’iyi kipe gutuza, ahamya ko iki cyaha ikurikiranweho itagikoze, bityo kitazayihama. Ati: “Culers, mwatuza. Barça ni umwere ku birego ishinjwa kandi irazira igikorwa (campaign) cyinjiyemo buri wese kugira ngo ikuzo ryayo ryangirike. Nta gitangaje, kandi tuzarwanirira Barça, tunerekane ko ikipe irengane. Abenshi bazihatira kwisubira.”
Iki cyaha kibaye cyarakozwe, cyaba cyaragize ingaruka ku marushanwa atandukanye, by’umwihariko shampiyona y’icyiciro cya mbere FC Barcelona yegukanye inshuro 9 hagati y’umwaka w’2001 n’2018 na UEFA Champions League yitabirwa n’amakipe ane aba yaritwaye neza muri Esipanye.
