Umuvugizi w’urwego rw’ubugenzacyaha (RIB), Dr Murangira Thierry, aravuga ko hari abanyamakuru babangamira akazi kayo k’iperereza, bikagera ku rwego rwo kubuza abo rushaka kuvugana n’abagenzacyaha.
Ibi Murangira yabikomojeho avuga ku nkuru y’abantu babiri bo mu karere ka Gicumbi batawe muri yombi tariki ya 13 Nyakanga 2023 bakekwaho kubeshyera Pasiteri ko yasambanyije umuyoboke we.
Mu kiganiro na Igihe, Murangira yagize ati: “Hari bamwe mu banyamakuru babangamira iperereza riri gukorwa, aho babuza uwahamagawe n’ubugenzacyaha ngo ntiyitabe. Hari n’abandi bahamagarwa, ugasanga umuntu arampamagaye ngo ni umunyamakuru ukorera aha.”
Aba banyamakuru ngo babaza uyu Muvugizi bati: “Ese ko kanaka mwamuhamagaye, muramushakira iki?”
Urundi rugero yatanze ngo ni urw’abanyamakuru baherekeza ku rwego rw’ubugenzacyaha abo rwahamagaye mu gihe yitabye. Murangira ati: “Ngo arashaka ko bamubaza ahari.”
Dr Murangira arahamya ko iyi mikorere ibangamira akazi k’urwego rw’ubugenzacyaha, bityo ko abanyamakuru bakwiye kuyihagarika.
