Mu Mudugudu wa Kabindi, mu Kagari ka Mahoko, ho mu Murenge wa Kanama, Akarere ka Rubavu, ku mugoroba wo kuri uyu wa Mbere habereye impanuka ikomeye yaguyemo abantu babiri abandi batatu barakomereka ndetse yangiza ibintu byinshi.
Umuturage wabonye iyi mpanuka wavuganye na Bwiza yagize ati “ Iyi mpanuka yabaye yabaye ahagasana saa kumi n’ebyiri n’iminota mirongo za nimugoroba. Umushoferi yazamukaga tumureba. Noneho ageze hariya hepfo gatoya kuri butike, imodoka arayigarika. Amaze kuyihagarika madamu we avamo ajya guhahira kwa muramu we. Amaze guhaha nibwo yongeye kwinjira mu modokari, amaze kwinjira mu modokari aratwara, amaze gutwara, nibwo yageze haruguru gatoya mu mabuye, imodoka ishaka kumunanira. Imunaniye, arwana na yo ayerekeza mu muhanda. Imodoka nibwo yahise igira gutya ijya ku ruhande, imaze kujya ku ruhande tubona ihagurukiye nko muri magana abiri niko navuga, nibwo yahise ikubita abantu bari barimo gucuruza ibigori hariya.”
Uyu yongeyeho ko iyi modoka yahise inagonga ibiti by’amashanyarazi, umushoferi aakomezaa kurwana na yo birangira isenye n’inzu y’umuturage.
Muri abo bantu bacuruzaga ibigori imodoka yagonze babiri bapfuye.
Nyiri iyi nzu yagonze avuga ko yari arimo gucaginga telephone yunamye akumva abantu bavuza induru. Ati “Negutse rero, ngiye gusohoka mbona imodoka yansatiriye, ubwo nsubira inyum, uko imodoka yahise ikubita igikuta ubwo nanjye naise njyana nacyo ndasohoka njyewe mvamo ndi muzima, navuyemo bari kuvuga ko hari abantu babiri baapfuye.”
Umwe mu bapfushije umwana we muri iyi mpanuka witwa Bizimungu Innocent, kuri ubu rasaba leta kumufasha kumushyingura kuko nta bushobozi we afite.
Umuyobozi wungirije w’Akarere ushinzwe imibereho myiza, Ishimwe Pacifique avuga ko yavuganye n’Umunyamabanga Nshingwabikorwa w’Umurenge wa Kanama, ngo bafashe iyi miryango gushyingura ababo.
Umuvugizi wa Polisi mu Ntara y’Iburengerazuba, CIP Mucyo Rukundo wemeje aya makuru, avuga ko iyi mpanuka yahitanye abantu babiri batatu bagakomereka, yongeraho ko impanuka yatewe n’umuvuduko mwinshi umushoferi yari afite, asaba abashoferi kwirinda umuvuduko ukabije ndetse saba abaturage kwirinda gucururiza mu mihanda kuko yagenewe ibinyabiziga.
Imirambo y’abapfuye yajyanwe mu Bitaro bya Gisenyi, mu gihe umushoferi we yishyikirije polisi.
Urebye aho impanuka yabereye, ubona atari ahantu hakabereye impanuka, ari naho abaturage bashingira bakeka ko uyu mushoferi ashobora kuba yari yasomye ku gasembuye.
