Itsinda Tugende heza Gitambi rigizwe n’abanyamuryango 43 barishinze bagamije kwikura mu bukene rikaba rimaze umwaka rikorera mu kagari ka Gahungeri muri uyu murenge wa Gitambi mu karere ka Rusizi,abarigize ngo batangiye kuzamurana borozanya amatungo magufi,kuko batangiye abenshi muri bo nta tungo bafite.
Iri tsinda nk’uko bamwe mu barigize babibwiye Bwiza.com, ngo babonye bagiye kuzahazwa n’ubukene,imiryango yabo iba mu buzima bubi,bahitamo kwishyira hamwe,bakajya bakora imirimo y’amaboko ayo bahembwe bakayashyira hamwe, abaye menshi bahitamo kugurira amatungo bagenzi babo batayafite,abadashoboye kubona mituweli na bo barabatangira,bakishimira ko na bo batangiye korora mbere nta kintu bagiraga.
[xyz-ihs snippet=”google-pub”]
Bavuga kandi ko bahereye ku bantu 23 boroje,bakaba bagiye kongera gukorera andi akabafasha kugera no ku bindi by’iterambere,aya matungo batanze,umwaka utaha akazaba amaze kubyara bakazoroza abandi 20 basigaye,ku buryo umwaka utaha buri munyamuryango wese azaba afite itungo,kandi nta n’umwe wo muri bo uzongera kugira ikibazo cya mituweli.
[xyz-ihs snippet=”google-pub”]
Umuyobozi w’iri tsinda Mazimpaka Pascal avuga ko uku kwishyira hamwe ngo bikure mu bukene babihereye ku mpanuro za Nyakubahwa perezida wa Repubulika uhora asaba abanyarwanda kwigira no kwihesha agaciro,babona ko ntawe bazasaba kuboroza,biyemeza kwishyira hamwe,aho babonye aho bakora umuhanda bakawukora,cyangwa akandi kazi bakayashyira hamwe,none bageze ku gikorwa nk’icyo cy’indashyikirwa.
Yagize ati’’ gutekereza kwikura mu bukene twabikuye ku mpanuro za Nyakubahwa perezida wa Repubulika Paul Kagame aho asaba abanyarwanda bose,kwigirano kwihesha agaciro,tukishakamo ibisubizo by’ibibazo byacu. Twasanze tutakomeza guheranwa n’ubukene no kubura mituweli ku miryango yacu duhitamo kwishyira hamwe,dutangira gukorera amafaranga tuyabika none dutangiye no korozanya.
Tumaze umwaka umwe gusa turishinze,ayo twabonye tuyaguzemo izi hene duhaye bamwe muri twe,nizibyara bazoroza abandi,umwaka utaha buri wese abazaba yoroye kwibonera mituweli bikazaba bitakiri ikibazo.’’
Nyiramatoroshi Felicité,umwe mu bahawe aya matungo yavuze ko yishimiye kuba yoroye nta tungo yagiraga,ashimira perezida Kagame watoje abanyarwanda kwishyira hamwe ngo biteze imbere,avuga ko kera kose iyo Leta zabanje zigisha abaturage kwishyira hamwe bakiteza imbere,buri muturage aba hari aho yigejeje mu bukungu.
Ati’’ nagiraga ikibazo cyo kubonera umuryango wanjye mituweli ariko hamwe n’uko kwishyira hamwe ubutaha sinzaba ngifite cyangwa ngo ngire icy’ifumbire kuko iri tungo mpawe rigiye kungirira akamaro gakomeye cyane kandi nanjye niteguye koroza abandi niribyara.’’
Umuyobozi w’akarere ka Rusizi Harelimana Frédéric wazibashykirije,yashimye uku kwigira kw’aba baturage,avuga ko bikwiye no kubera abandi urugero.
Yagize ati’’ uku ni ko kwigira nyako aho mwishaka mo ibisubizo by’ibibazo mufite,mukishyira hamwe mukorozanya nk’uku. Bibere n’abandi urugero bihereye muri uyu murenge bizagere n’ahandi,buri muturage wese yorore yorojwe na mugenzi we,bizongera n’urukundo hagati yanyu.’’
Umunyamabanga nshingwabikorwa w’umurenge wa Gitambi,Habimana Emmanuel,avuga ko bahise mo korozanya ku mugaragaro imbere y’umuyobozi w’akarere kugira ngo bibere n’abaturage bandi isomo batangire bishyire hamwe biteze imbere bahereye ku itsinda rito nk’iri ritangiriye ku mafaranga rikorera mu mirimo y’amaboko rikiteza imbere,n’abatekerezaga ko bidashoboka babirebere kuri aba.
Kanda hano ujye ubona amakuru yihuse kandi kugihe kuri Facebook no kuri twitter
BAHUWIYONGERA Sylvestre
