Perezida watowe wa Kenya, William Ruto, yavuze ko yavuganye na mukeba we Raila Odinga mbere yuko ibyavuye mu matora yo ku ya 9 Kanama bitangazwa, yongeraho ko ataravugana na Perezida Uhuru Kenyatta ku iterambere rya politiki ariko ategereje ko bizaba vuba.
Ati: “Nzi neza ko hazabaho ikiganiro. Ndi Perezida watowe kandi hazabaho inzibacyuho kandi nzi neza ko hazabaho ibiganiro hagati ya Perezida uriho na njye ubwanjye “.
Ati: “Nahamagaye Raila tugirana ikiganiro kandi twemeranya ko uko bizagenda kose, tuzaganira.”
Icyakora avuga ko umuntu wese utaranyuzwe n’ibisubizo byatangajwe n’umuyobozi wa IEBC, Wafula Chebukati, agomba kwitabaza urukiko.
Nk’uko iyi nkuru dukesha ikinyamakuru The Star cyo muri Kenya ikomeza ivuga, Ruto yavuze ko azakorana na benshi kugirango habe uruhare runini rwa opposition.
Perezida watowe yavuze ko yizeye ko azagera kuri Perezida Kenyatta kugira ngo baganire ku buryo bwo guteza igihugu imbere nyuma y’ibyatangajwe na IEBC.
Ati: “Aya matora niyo yabaye mu mucyo kurusha ayandi yose yakorewe muri Kenya. Birashoboka ko abantu batengushywe ari abantu bizeraga imiyoborere ifite ikindi ihishe ”.
Ati: “Ndi umudemokarate. Nizera kugendera ku mategeko. Nubaha ibigo. Wabonye uburyo ikipe yacu yahaye umwanya IEBC. Tuzubahiriza ikindi cyemezo cyose cy’izindi nzego. ”
Ruto yavuze ko yamenyesheje Odinga ibyabaye kandi ko bakeneye kwicara no kuganira ku bintu byo kwibandaho.
Ati: “Navuze ko nzaboneka tugasangira icyayi kuko hari aho dushobora kumvikana. Nzi neza ko umunywanyi wanjye azagira uruhare nk’umuyobozi wa opposition ”.
Ruto kandi yamaganye igikorwa cy’abakozi bane ba Komisiyo y’amatora batemeye intsinzi ye, avuga ko bakoreraga abantu bashaka gusubiza Kenya mu byabaye mu 2017.
Ati “Amashusho wabonye kuri uyu mugoroba ntashobora gusubiza inyuma intsinzi yanjye.”
Yavuze ko igihugu cyateye intambwe nini mu micungire y’amatora.
Ati: “Abaturage ba Kenya baratoye, abakomiseri ntibagomba gutora. Abakomiseri bane nta bwoba na bucye bateye ku bijyanye n’amategeko ku byavuye mu matora … kandi umuyobozi wa IEBC, Wafula Chebukati, yabikoze akurikije amategeko, ”
Yavuze ko ikindi kintu cyose uretse ibisubizo byatangajwe na Chebukati ari ibyo ku ruhande, yongeraho ko amatora yerekanye ko nta butegetsi bundi buhishe cyangwa ‘Deep State’ muri Kenya.
