Abaturage bane baherutse gushimutwa n’inyeshyamba za FDLR kuwa Gatandatu ushize, itariki 25 Nzeri muri Teritwari ya Rutshuru, mu Ntara ya Kivu y’Amajyaruguru, harakekwa ko baba barapfuye.
Aba baturage bashimutiwe mu duce twa Nyamilima na Buramba, aho Aimé Mukanda Mbusa, umwe mu bavuga rikijyana akaba n’impirimbanyi y’uburenganzira bwa muntu muri Rutshuru avuga ko baba barishwe n’izi nyeshyamba zo mu mutwe wa FDLR ugizwe n’Abanyarwanda.
Iyi nkuru dukesha Mediacongo.net iravuga ko imiryango yabo yanatangiye ikiriyo mu gihe itegereje ko imirambo y’ababo izaboneka.
Mu ijoro ryo kuri uyu wa Kane, itariki 30 Nzeri avugana na ACTU7.CD, Mbusa yagize ati “ Bashobora kuba baramaze gupfa, mu gihe dutegereje ibizava mu bushakshatsi bw’imirambo yabo, turasaba guverinoma ya Congo gufata abanzi badushyira mu cyunamo kandi baduhungabanyiriza umutekano,”
Biravugwa ko ibikorwa byo gushimuta bikomeje gutwara ubuzima bw’abantu muri iyi Teritwari ya Rutshuru nubwo hashyizweho ibihe bidasanzwe abayobozi b’ibanze bari bishimiye bizeye ko bizazana impinduka nk’izifuzwaga n’umukuru w’igihugu.
