Amakuru aturuka muri Repubulika ya Demukarasi ya Congo (RDC) aravuga ko abasirikare babarizwa muri Regima ya 3412 iri mu gace ka Nyamilima muri Gurupoma ya Binza, Teritwari ya Rutshuru, bataye muri yombi Major Katuleve wigeze kuba umufatanyabikorwa ukomeye w’umutwe witwaje intwaro wa FDLR, urwanya Leta y’u Rwanda.
Impamvu y’itabwa muri yombi rya Katuleve bivugwa ko ari uko yaba ari inyuma y’ibikorwa bihungabanya umutekano w’abaturage muri Teritwari ya Rutshuru, by’umwihariko muri Nyamilima birimo ubujura, ubushimusi n’ubwicanyi.
Katuleve yarambitse intwaro mu 2020, yitura Leta ya RDC muri gahunda yo gusubiza mu buzima busanzwe abari abasirikare, DDRRR yatangije na Misiyo y’Umuryango w’Abibumbye ishinzwe kubungabunga umutekano muri iki gihugu, MONUSCO.
Nyuma yo gusubira mu buzima busanzwe, ngo yakoraga uburobyi butemewe mu kiyaga cya Edouard gitandukanya RDC na Uganda, ahaherera mu gace ka Nyakakoma.
