Senateri wo muri demukarasi ya Congo, Ambasaderi Francine Muyumba, yibasiye intumwa zoherejwe mu nama mpuzamahanga y’Inteko zishinga amategeko (IPU) yabereye muri Bahrain, zikananirwa kwemeza amahanga ko agomba kwamagana u Rwanda.
Mu mujyi wa Manama tariki ya 12 Werurwe 2023, Prof. André Mbata Mbangu wari uyoboye intumwa z’Inteko ya RDC yasobanuriye abandi bashingamategeko bahagarariye ibihugu byabo ko u Rwanda rwateye igihugu cyabo rubinyujije mu mutwe witwaje intwaro wa M23.
Prof. Mbata yasabye aba bashingamategeko gukora itora risaba u Rwanda “guhagarika gufasha M23, guhagarika ubushotoranyi, guhagarika gufata ibice [by’igihugu cyabo] no guhagarika ibikorwa bibangamira uburenganzira bw’ikiremwamuntu.”
Icyakoze, mbere yo gutangira itora, IPU yahaye ijambo Nyirasafari Esperance wari uyoboye itsinda ry’u Rwanda, asobanura ko ikibazo cy’umutekano muke muri RDC gikomoka ku buyobozi bubi bwananiwe kugikemura, bukacyegeka ku baturanyi. Yatanze urugero rw’uko muri iki gihugu hakorera imitwe yitwaje intwaro irenga 120.
Itora ryarabaye, abashingamategeko 705 batora bamagana ubusabe bwa Prof. Mbata, 88 barabushyigikira, abandi 700 barifata; bisobanuye ko muri rusange ubusabe bw’intumwa z’Inteko ya RDC bwo kwamagana u Rwanda bwanzwe.
Senateri Muyumba yibasiye Prof. Mbata na bagenzi be
Muyumba mu butumwa yatangaje kuri uyu wa 20 Werurwe, yamaganye intumwa zari zihagarariye Inteko ishinga amategeko ya RDC muri iyi nama ya IPU, asobanura ko zakoze ikosa ryo kutabanza kwumvisha amahanga uko ikibazo cyazo giteye (lobbying).
Uyu musenateri yagize ati: “Twamaganye intege nke itsinda ry’Inteko ishinga amategeko ya RDC yagaragaje mu Nteko y’146 ya UIP. Itora mu muryango mpuzamahanga ribanzirizwa na za lobbyings mu bihugu mbere y’uko riba.”
Muyumba avuga ko igisebo RDC yagiriye muri Bahrain ari ingaruka zo kwima umwanya imitwe itavuga rumwe n’ubutegetsi mu nteko ishinga amategeko.
Yamaganye icyo yo mu nzego zo hejuru mu nteko ishinga amategeko ya RDC, ituma dipolomasi yayo iciririka.
