Senateri mu nteko ishinga amategeko ya Kenya, Karen Nyamu, yasohowe mu cyumba cy’Inteko azira imyambarire itemewe n’amabwiriza abagenga.
Ikinyamakuru Citizen gisobanura ko kuri uyu wa 14 Gashyantare 2023, Senateri Nyamu yagiye mu cyumba cy’Inteko yambaye ijipo ngufi y’igitenge ndetse n’iburuze y’umukara itagira amaboko.
Umukuru wa sena, Amason Kingi, yabanje gusomera Senateri Nyamu amabwiriza agenga imyambarire y’abasenateri, ati: “Abasenateri barasabwa kutinjira mu cyumba, mu byicaro cyangwa mu buriro mu gihe batambaye mu buryo bukwiye.”
Kingi yakomeje asoma iyi ngingo, asobanura ko umusenateri w’umugabo aba agomba kwambara ikoti, karuvati, ipantalo ndende, amasogizi n’inkweto cyangwa se impuzankano y’akazi, umwambaro w’idini cyangwa se undi, yabanje kubyemererwa n’umuyobozi wabo.
Uyu muyobozi yavuze ko iri bwiriza rireba n’abasenateri b’abagore ati: “Bashobora kwambara igitenge cyangwa indi myambaro nyafurika.”
Amaze gusoma iri bwiriza, yasabye Senateri Nyamu gusohoka, akajya kwambara mu buryo bukwiye, hanyuma agasubira mu cyumba. Ati: “Senateri Nyamu, ntewe ubwoba n’uko utubahirije ibwiriza, kandi ngiye kugusaba gusohoka, wambare neza, hanyuma ugaruke.”
