Muri Senegal, abahoze ari abaminisitiri batanu bazaburanishwa bidatinze n’Urukiko Rukuru rw’Ubutabera. Kuri uyu wa Kane, itariki ya 8 Gicurasi, nibwo benshi mu badepite bagize inteko ishinga amategeko batoye icyemezo cyo gukurikirana abo bantu. Urubanza ruzatangira vuba aha muri uru rukiko rwihariye, rukaba ari narwo rwonyine rwemerewe kuburanisha imanza z’abahoze ari abaminisitiri cyangwa abakuru b’igihugu. Ibirego bishinja aba minisitiri ahanini bifitanye isano no gukekwaho gukoresha nabi amafaranga yo kurwanya icyorezo cya Covid-19, usibye uwahoze ari Minisitiri w’ubutabera, ushinjwa ruswa.
Moustapha Diop, Amadou Mansour Faye, Aissatou Sophie Gladima, Salimata Diop na Ismaïla Madior Fall, abahoze ari abaminisitiri bose ku butegetsi bwa Macky Sall, bagize itsinda rya mbere ry’abahoze ari abaminisitiri bazitaba Urukiko Rukuru rw’Ubutabera nk’uko iyi nkuru dukesha RFI ivuga.
Igice cyiki kigega kiswe “Covid-19 force” cyari kigamije gutera inkunga ingo n’ubucuruzi byari bigowe mu gihe cy’icyorezo bivugwa ko cyayobejwe. Raporo y’Urukiko rw’Ubugenzuzi mu 2023, ni yo yasunikiye ubushinjacyaha bw’imari bwa Dakar hagati muri Mata butangaza ko bufite umugambi wo gukurikirana abantu benshi, barimo n’abahoze ari abaminisitiri.
Urukiko rwitabajwe kabiri gusa kuva mu 1960
Abadepite benshi rero bahisemo guha ubutabera uburenganzira kugira ngo butange umucyo kuri iryo nyerezwa ry’imari ya leta. Muri ba minisitiri batanu, uwahoze ari Minisitiri w’ubutabera ni we wenyine ukurikiranyweho icyaha kidafitanye isano na Covid-19. Ismaïla Madior Fall we arashinjwa gukoresha nabi umutungo, ruswa, n’ibindi.
Kuva mu 1960, ngo Urukiko Rukuru rw’Ubutabera rwitabajwe kabiri gusa. Mu 1963 kugira ngo rucire urubanza uwahoze ari Perezida w’Inama Njyanama, Mamadou Dia, no mu 2005 ku wahoze ari Minisitiri w’Intebe, Idrissa Seck, waje kwemererwa kudakurikiranwa burundu.
