Bamwe mu baturage bashyigikiye uruhande rutavuga rumwe n’ubutegetsi bw’inzibacyuho muri Sudani kuri uyu wa Gatandatu bakoze imyigaragambyo i Khartoum mu murwa mukuru basaba igisirikare gufata ubutegetsi.
Ibihumbi n’ibihumbi by’abigaragambya bateraniye hanze y’ingoro ya perezida, mu gihe ibibazo bya politiki muri iki gihugu birimo gufata indi ntera.
Amatsinda y’abasirikare n’ay’abaturage b’abasivile amaze igihe asangiye ubutegetsi kuva uwahoze ari Perezida Omar al-Bashir yahirikwa mu mwaka wa 2019.
Kuva habaho igerageza ryo guhirika ubutegetsi ryashinjwe abayoboke ba Bashir ryaburijwemo muri Nzeri ubushyamirane bukomeje gufata intera muri iki gihugu.
Abayobozi b’ingabo bakomeje gusaba ko guverinoma isimbuzwa ndetse hakaba amavugurura mu rugaga ruzwi nka Forces of Freedom and Change (FFC), uru rukaba ari urugaga rw’abasivile rwayoboye imyigaragambyo yamaganaga Bashir ndetse rukaba rwari igice cy’ingenzi muri guverinoma y’inzibacyuho.
AFP ivuga ko kuri uyu wa Gatandatu abigaragambya basabye umukuru w’ingabo akaba n’umukuru w’akanama k’abasirikare n’abasivile kari ku butegetsi, Gen. Abdel Fattah al-Burhan, guhirika ubutegetsi bw’inzibacyuho igisirikare kikabwigarurira.
Hagati aho ariko, abashyigikiye guverinoma iriho na bo bahamagaje imyigaragambyo ku wa kane yo gusubiza iyaraye ibaye kuri uyu wa Gatandatu.
