Minisitiri w’Intebe wa Sudani, Abdalla Hamdok yaraye arekuwe n’abasirikare bafashe ubutegetsi asubira iwe mu rugo ku mugoroba wo kuri uyu wa Kabiri nk’uko byatangajwe n’ibiro bye.
Hamdok yari afungishijwe ijisho mu gihe abandi baminisitiri n’abandi bayobozi b’abasivili bamaganye ihirika ry’ubutegetsi bagifunzwe nyuma y’aho abasirikare basenye inzego z’igihugu kuwa Mbere.
AFP yatangaje ko Hamdok yarekuwe nyuma y’aho Leta Zunze Ubumwe za Amerika zari zatangaje ko zihagarika inkunga zitera Sudani ndetse n’Umuryango w’Ubumwe bw’u Burayi uvuga ko ubiteganya.
Umunyamabanga Mukuru wa Loni, Antonio Guterres, yari yasabye ko Hamdok arekurwa nta yandi mananiza mbere y’inama y’igitaraganya y’Akanama k’Amahoro n’Umutekano yateranye saa mbiri z’ijoro ku isaha ngengamasaha GMT.
Ihirika ry’ubutegetsi ryo muri Sudani ryabaye nyuma y’imyaka ibiri ya guverinoma y’agateganyo yari ihuriyemo abasirikare n’abasivili yashyizweho nyuma y’irikwa rya Omar al-Bashir muri Mata 2019.
Imyigaragambyo yamagana iri hirika ry’ubutegetsi mu mihanda ya Khartoum ikaba imaze kwicirwamo abaturage bane bishwe barashwe n’abashinzwe umutekano mu gihe abandi mirongo bakomeretse.
