Igipolisi cya Tanzania mu Ntara ya Kigoma kiremeza ko hari abagizi ba nabi n’udutsiko tw’abantu bitwaje intwaro mu nkengero z’Inkabi y’Impunzi ya Nyarugusu. Mu ijoro ryo kuwa 15 Nyakanga, abo bagizi ba nabi bahanganye n’igipolisi, abantu bane barimo abasivili babiri b’Abanyatanzaniya bahasiga ubuzima.
Mu kiganiro n’itangazamakuru kuwa 16 Nyakanga 2019, Martin Otieno, Umukuru w’Igipolisi mu Ntara ya Kigoma, yatangaje ko nyuma y’igitero cyo ku Cyumweru mu Nkambi ya Nyarugusu, igipolisi cyabonye amakuru ahishura ahantu utwo dutsiko twitwaje ibirwanisho twagabye icyo gitero twihishe.
Yakomeje avuga ko hagendewe kuri ayo makuru yavuye mu nkambi, igipolisi cyakurikiranye abo bagizi ba nabi mu ijoro ryo kuwa Mbere, ariko igikorwa kikaza kuvukamo guhangana nk’uko tubikesha ikinyamakuru RPA cyo mu Burundi.
Otieno ati: “Dufashijwe n’abaturage, twabashije kubakurikirana. Abo bagizi ba nabi baturasheho, ariko, bitewe no kwiyemeza kw’abatumurikiraga, twabashije gucika uko kuraswa. Ariko kubw’ibyago, babiri mu batumurikiraga barapfuye. Igipolisi cya Tazaia kishe babiri muri ayo mabandi.”
Ku rundi ruhande, Martin Otieno yemeje ko igipolisi cyafashe magazine ebyiri z’imbunda na telephones zigera muri 40. Mu ijoro ryo ku Cyumweru, itariki 15 NNyakanga, I Nyarugusu, impunzi zatagaje ko humvikanye urusaku rw’amasasu mu gihe cy’amasaha atatu. Biravugwa ko icyo gihe hibwe amafaranga hataramenyekana umubare mu ngo eshatu.
Inkambi ya Nyarugusu ni imwe mu nkambi z’impunzi nini ku Isi muri iki kinyejana cya 21, ikaba icumbikiye impunzi zikabakaba 150,000. Yashinzwe na HCR mu 1996, nyuma y’aho impunzi z’Abanyekongo 150,000 zihunze imirwano muri Kivu y’Amajyepfo.
Iyi nkambi iherereye mu burengerazuba bw’Intara ya Kigoma, muri Tanzania, mu birometero nka 150 mu burasirazuba bw’Ikiyaga cya Tanzania. Kuri ubu impunzi z’Abarundi zibarirwa mu 65,000 ziracyabarizwa muri iyi nkambi, mu gihe izindi 55,000 ziri mu Nkambi ya Nduta, naho 19,000 bakaba bari mu nnkambi ya Mtendeli.
