Minisitiri w’ubwikorezi w’u Bufaransa yasabye ko hakorwa iperereza ku kumenya niba igihangange mu bucuruzi bwa peteroli cy’Abafaransa, TotalEnergies, cyaba ari cyo giha indege z’intambara z’u Burusiya lisansi zikoresha binyuze mu mushinga uhuriweho.
Kuri uyu wa Kane, Clement Beaune yagize icyo atangaza kuri raporo y’itangazamakuru ivuga ko TotalEnergies igira uruhare mu gutanga gaz itunganwa igakurwamo lisansi ishobora kuba ikoreshwa n’indege z’intambara z’u Burusiya muri Ukraine.
Ni ibikorwa byaba bica inyuma ibihano byashyizweho n’u Bufaransa n’Umuryango w’Ubumwe bw’ibihugu by’u Burayi mu rwego rwo kwamagana ibitero by’u Burusiya kuri Ukraine.
Beaune imbere ya France2 yagize ati: “Iyi ni ingingo ikomeye cyane, bityo rero hagomba kubaho iperereza ryerekana niba, ku bushake cyangwa bitari ubushake, harabaye ukurenga ku bihano …”.
Iperereza kuri TotalEnergies
Ikinyamakuru Le Monde gisohoka buri munsi, kifashishije amakuru y’iperereza yakusanyijwe n’umuryango udaharanira inyungu Global Witness, cyasanze lisansi y’indege yagejejwe ku birindiro bibiri by’ingabo zirwanira mu kirere z’u Burusiya muri Siberiya bishobora kuba byaragize uruhare mu bitero by’indege muri Ukraine, yarakuwe muri gaz yatunganyijwe yatanzwe na Terneftegaz yo mu Burusiya, TotalEnergies ifitemo imigabane 49%.
Indi migabane 51% ifitwe na sosiyete yo mu Burusiya Novatek, aho TotalEnergies naho ifite imigabane 19.4%.
Louis Wilson wo muri Global Witness yabwiye RFI ati: “Ni ubwa mbere dufite ibimenyetso byerekana isano iri hagati ya TotalEnergies n’ibikorwa by’ingabo z’u Burusiya muri Ukraine.”
Yavuze ko indege z’intambara zavuye ku birindiro byavuzwe ruguru zagize uruhare mu bitero byinshi byibasiye abasivili ba Ukraine, harimo n’igitero cyagabwe i Chernihiv, hanze ya Kiyv, ku ya 3 Werurwe, cyahitanye abasivili 47; bari batonze umurongo bategereje guhabwa ibiryo. Ati “Ibyo ni ibyaha by’intambara bigaragara.”
TotalEnergies irahakana
TotalEnergies yavuze ko itagize uruhare mu byo ishinjwa, kandi ko ntacyo izi ku bijyanye na lisansi yaba ikoreshwa n’indege z’intambara z’u Burusiya itanzwe nabafatanyabikorwa bayo mu bucuruzi.
