Perezida wa Amerika, Donald Trump yongeye gukangisha Iran ibitero bikomeye bishobora gusenya ibikorwa remezo by’ingenzi, mu gihe ibiganiro bigamije kugabanya umwuka mubi hagati y’impande zombi bikomeje kudindira.
Trump yatangaje ko Leta Zunze Ubumwe za Amerika zigiye kohereza intumwa mu mujyi wa Islamabad muri Pakistan, aho hateganyijwe gukomereza ibiganiro na Iran. Icyakora, yagaragaje ko niharamuka hatabayeho kumvikana, Amerika ishobora gufata ingamba za gisirikare zikomeye, zirimo kwibasira ibikorwa remezo birimo ingomero z’amashanyarazi n’ibiraro.
Ibi bije mu gihe agahenge kari hagati ya Amerika, Iran na Israel kari hafi kurangira, ibintu bikomeje gutera impungenge ku mutekano w’akarere. Ibiganiro biheruka byabereye i Islamabad ntibyatanze umusaruro, aho impande zombi zagaragaje ko zikiri kure cyane mu kumvikana ku bibazo bikomeye.
Perezida wa Iran, Masoud Pezeshkian, yashimangiye ko igihugu cye gifite uburenganzira busesuye bwo gukomeza gahunda yacyo ya nikereyeri, avuga ko igamije ibikorwa by’amahoro. Ibi ariko binyuranyije n’icyifuzo cya Amerika isaba ko iyo gahunda igabanywa cyangwa igahagarikwa burundu.
Ikindi kibazo gikomeye kiri hagati y’impande zombi ni imikoreshereze ya Hormuz, ifite uruhare runini mu gutwara ibikomoka kuri peteroli ku isi. Iran imaze igihe ifunga no gufungura iyo nzira bitewe n’ibihe by’umutekano, mu gihe Amerika yashyizeho ibihano birimo no kugenzura ibyambu byayo.
Iran yatangaje ko amato yose azanyura muri iyo nzira atabiherewe uburenganzira ashobora gufatwa nk’afite imigambi mibi, mu gihe ivuga ko ibikorwa bya Amerika byo kuyifungira inzira z’ubucuruzi bihabanye n’amasezerano y’agahenge.
Hagati aho, umutekano wakajijwe cyane i Islamabad mbere y’uko intumwa za Amerika zihagera, aho hashyizweho igenzura rikomeye ku ngendo z’abantu n’ibinyabiziga, ndetse n’ingabo zongera kuboneka mu bice bitandukanye by’umujyi.
Nubwo Trump yigeze kuvuga ko Iran yemeye gutanga uranium itunganyije, ubuyobozi bw’iki gihugu bwabihakanye, buvuga ko nta masezerano nk’ayo bwigeze bugirana na Amerika.
Mu gihe igihe cy’agahenge kiri kugana ku musozo, haracyari urujijo ku hazaza h’ibi biganiro, aho ubuyobozi bw’impande zombi bukomeje kugaragaza ubushake bwo kuganira, ariko nanone bugakomeza gutanga ubutumwa bushobora kongera umwuka mubi mu mubano wabyo.
