Igisirikare cya Repubulika Iharanira Demokarasi ya Congo (FARDC) cyamenyenyesheje abasirikare bakuru bose n’abapolisi ko nta wemerewe gusohoka mu gihugu cyangwa kuva aho ari, kugeza igihe bazamenyesherezwa.
Bikubiye mu butumwa FARDC yatanze biciye mu mugaba mukuru w’Ingabo zayo, Lt.Gen. Banza Jules Mwilambwe.
Itangazo Lt. Gen. Banza yashyize hanze yifashishije urubuga rwa Telegrame, rimenyesha abayobozi bakuru muri FARDC “guhita bahagarika gukora ingendo bakimara kubona ubu butumwa, haba mu gihugu imbere cyangwa hanze yacyo.”
Rikomeza rivuga ko ari ubutumwa bunareba abapolisi bakuru, kandi ko n’abari muri Kinshasa batemerewe kuyivamo, ahubwo ko “buri wese agomba gukomeza gukorera aho ari kugeza igihe irindi tegeko rishya rizatangirwa.”
Aya mabwiriza yatanzwe mu gihe hamaze iminsi hari icyikango cy’uko hari abasirikare bakomeye baba bafite umugambi wo guhirika ku butegetsi Perezida Félix Antoine Tshisekedi.
Bamwe muri aba basirikare barimo Gen. Christian Tshiwewe Songesa wahoze ari Umugaba Mukuru w’Ingabo za RDC na Lt. Gen. Franck Ntumba wari ukuriye ibikorwa bya gisirikare mu biro bya Tshisekedi bamaze iminsi bafunzwe, nyuma yo gukekwaho uriya mugambi.
Andi makuru avuga ko abasirikare ba FARDC babujijwe gukora ingendo, kubera ko i Kinshasa ngo haba hari amakuru y’uko hari benshi muri bo baba bashaka kwihuza n’umutwe wa AFC/M23 urwanya ubutegetsi bwa Tshisekedi.
