Shanseriye (Chancellor) w’u Budage, Olaf Scholz, yamenyesheje abagize inteko ishinga amategeko ko iki gihugu kigiye koherereza Ukraine misile zigezweho za IRIS-T zihanura indege ndetse n’ikoranabuhanga rya ‘radar’ rifite ubushobozi bwo gutahura intwaro z’umwanzi.
Ibiro ntaramakuru by’Abanyamerika, AP (Associated Press), byatangaje ko Scholz yamenyesheje iki cyemezo abagize inteko kuri uyu wa 1 Kamena 2022.
Ni icyemezo guverinoma y’u Budage yafashe nyuma y’aho iki gihugu kiri mu bigize umuryango w’ubufatanye mu bya gisirikare wa NATO, kivuzweho kudafasha mu buryo bukwiye Ukraine ikomeje gusaba intwaro zatuma ingabo zayo zishobora guhangana n’iz’u Burusiya.
Misile za IRIS-T zakorewe mu Budage ku bufatanye n’ibindi bihugu bigize NATO. Guverinoma y’iki gihugu yemeye kuzohereza muri Ukraine nyuma y’aho muri Mata 2022 nabwo yemeje kohereza ibifaru bivuguruye bya Gepard cyo kitagikoresha.
