Ubushakashatsi buherutse gukorwa ku mfu ziterwa n’inzoka mu Buhinde, bwagaragaje ko abantu barenga miliyoni n’ibihumbi magana abiri (1,200,000) bamaze kwicwa nazo mu myaka 20 ishize.
Abantu bishwe n’izi nzoka bari hagati y’imyaka 30 na 69 y’amavuko, bakaba bicwa ahanini n’inzoka zo mu bwoko bwa Russell’s vipers, kraits ndetse na cobra. Hari ubundi bwoko 12 kandi bw’inzoka gusa zifite umubare muto muto w’abo zishe.
Impamvu nyamukuru iterwa n’izi mfu ntabwo ari ukuba zibaruma nk’uko BBC yabigaragaje mu nkuru yasohoye tariki ya 8 Nyakanga 2020, ahubwo ziterwa no kuba batabona ubutabazi bwihuse bitewe n’uko nta serivisi z’ubuvuzi zibegereye.
Kimwe cya kabiri cy’izi mfu kibaho hagati y’ukwezi kwa Kamena na Nzeri, mu gihe cyiganzamo ubushyuhe.
Ubu bushakashatsi buvuga ko ubwoko bw’inzoka bwa Russell’s Vipers bukunze kugaragara mu Buhinde no ku mugabane w’Aziya wose. Ububi bwazo ni uko zikunda ahantu hatuye abantu; haba mu mijyi cyangwa mu byaro.
Ubwoko bwa Kraits bwo ntabwo bukunda kuboneka mu masaha y’amanywa, keretse bwije. Izi nzoka kandi zishobora gukura zikareshya na metero 1.75.
Ubwoko bwa Cobra nabwo butera mu masaha y’umwijima, ububi bwazo bukaba ko uwo zirumye ashobora no kuvira mu nda. Biba bisaba ubutabazi bwihuse kugira ngo umuntu arokoke urupfu nyuma yo kurumwa na Cobra.
Ubushakashatsi bwakozwe n’Umuryango Mpuzamahanga wita ku Buzima, WHO, mu 2019, bugaragaza ko byibuze ku Isi yose, inzoka zica abantu barenga 100,000 mu mwaka umwe. Ni mu gihe muri rusange ziruma abarenga miliyoni 5.4, abarenga 400,000 bakaba bahakura ubumuga buhoraho.
