U Buhinde bwahagaritse filime documentaire ya BBC yibajije ku ruhare rw’ubuyobozi bwa Minisitiri w’intebe Narendra Modi mu gihe cy’imyivumbagatanyo yo muri Gujarat mu 2002, buvuga ko no gusangiza amashusho ayo ari yo yose binyujijwe ku mbuga nkoranyambaga byabujijwe .
Kuri uyu wa Gatandatu, Kanchan Gupta, umujyanama wa guverinoma, ku rubuga rwe rwa Twitter, yatangaje ko amabwiriza yo kubuza gukwirakwiza aya mashusho yatanzwe hakoreshejwe ingufu guverinoma ihabwa hakurikijwe amategeko agenga ikoranabuhanga mu gihugu.
Minisiteri y’Itangazamakuru ikaba yategetse televiziyo kuterekana ayo mashusho ivuga ko atesha umutwe kandi anyuranyije cyane n’amahame agenga abanyamakuru mu gihe batangaza impanuka, impfu, n’ihohoterwa birimo ihohoterwa rikorerwa abagore, abana, n’abageze mu zabukuru.
Mu gihe BBC itigeze yerekana filime mu Buhinde, iyi videwo yashyizwe ku mbuga zimwe na zimwe za YouTube nk’uko Gupta akomeza avuga.
Gupta yavuze ko guverinoma yahaye amabwiriza Twitter yo guhagarika tweet zirenga 50 zisangiza amashusho y’iyi filimi mbarankuru ndetse na YouTube isabwa guhagarika gushyiraho ayo mashusho.
Yongeyeho ko YouTube na Twitter byombi byubahirije amabwiriza.
Modi yari minisitiri mukuru wa leta yo mu burengerazuba ya Gujarat igihe yabagamo imvururu z’abaturage zahitanye abantu barenga 1.000, bitewe na leta, abenshi muri bo bakaba bari Abayisilamu. Urugomo rwadutse nyuma y’aho gari ya moshi yari itwaye Abahindu bari bagiye mu rugendo rutagatifu yafatwaga n’inkongi y’umuriro, igahitana 59.
Abaharanira uburenganzira bwa muntu bavuga ko byibuze inshuro ebyiri z’umubare watangajwe wapfiriye mu mvururu.
Modi yahakanye ibirego bivuga ko yananiwe guhagarika imvururu. Itsinda ry’iperereza ryihariye ryashyizweho n’Urukiko rw’ikirenga kugira ngo rikore iperereza ku ruhare rwa Modi n’abandi mu ihohoterwa ryavuzwe muri raporo y’impapuro 541 mu mwaka wa 2012 ntiryabonye ibimenyetso bifatika byatuma Modi, wari minisitiri icyo gihe, akurikiranwa.
Nyuma Modi yaje kugirwa umuyobozi w’ishyaka rye, ishyaka ry’Abahindu, Bharatiya Janata Party, yayoboye akarigeza ku butegetsi mu matora rusange yo muri 2014 no muri 2019.
