Umugaba Mukuru w’ingabo z’u Burundi, Gen. Prime Niyongabo, yemeje ko abasirikare babo baroherezwa mu ntara ya Kivu y’Amajyaruguru kuri uyu wa 4 Werurwe 2023.
Ni icyemezo yamenyesheje Umunyamabanga Mukuru w’umuryango wa Afurika y’iburasirazuba, Dr Peter Mathuki.
Kohereza ingabo z’u Burundi muri Kivu y’Amajyaruguru biri mu rwego rwo kubahiriza icyemezo cyafashwe n’abagaba bakuru b’ibihugu byo mu muryango wa Afurika y’iburasirazuba tariki ya 9 Gashyantare, ubwo bari bateraniye i Bujumbura.
Iki cyemezo kivuga ko ingabo z’u Burundi zigomba koherezwa muri teritwari ya Masisi, iza Kenya na Sudani y’Epfo zoherezwe mu bice biri hagati ya Goma na Rutshuru, iza Uganda zoherezwe mu bice biri mu burasirazuba bwa teritwari ya Rutshuru birimo Bunagana.
Dr Mathuki yatangaje ko nyuma y’iz’u Burundi, izindi ngabo zo mu bihugu bya EAC zizoherezwa muri Kivu y’Amajyaruguru mu bihe bitandukanye byagenwe.
Ingabo z’u Burundi zishobora kudahita zijya muri Masisi, kuko abagaba bakuru b’ingabo bemeje abasirikare bo muri EAC bazagenzura ibice M23 izaba yararekuye. Kugeza uyu munsi, uyu mutwe witwaje intwaro uracyagenzura ibice bimwe byo muri iyi teritwari n’ibindi byo muri Rutshuru.
