Ingabo z’u Burusiya zatangaje ko kuva zatangira ibikorwa byihariye muri Ukraine muri Gashyantare 2022, zimaze gusenya imbunda z’igisirikare bahanganye zirasa roketi n’izirasa misile zirenga 1300, no guhanura indege zirenga 500.
Byatangajwe n’Umuvugizi wa Minisiteri y’ingabo, Lt Gen. Igor Konashenkov, muri raporo y’umwaka yagejeje ku Barusiya tariki ya 27 Ukuboza 2022, nk’uko byemezwa n’ibiro ntaramakuru TASS.
Lt Gen. Konashenkov yagize ati: “Muri byose, ibi bipimo byarasenywe kuva ibikorwa byihariye by’igisirikare byatangira: indege z’intambara 352, kajugujugu 192, indege zitagira abapilote 2,734, intwaro zirasa indege 399, ibifaru 7,282 n’izindi ndege z’intambara, intwaro 950 zirasa roketi nyinshi, imbunda 3,737 za artillery na za mortar.”
Mu ntwaro avuga ko ingabo z’u Burusiya zasenye harimo: imbunda za M777 zakorewe muri Leta zunze ubumwe za Amerika, FH70 zakorewe mu Budage, D-20 na D-30 zakorewe muri Ukraine.
Gusa Lt Gen. Konashenkov ntabwo yatangaje igiteranyo cy’abasirikare ba Ukraine ingabo z’u Burusiya ziciye ku rugamba, keretse kuvuga abarenga 30 yemeza ko baherutse kwicirwa mu gace ka Kharkov n’abandi 170 baherutse kwicirwa muri Donetsk na Luhansk.
Ingabo za Ukraine zo zatangaje ko kugeza kuri uyu wa 29 Ukuboza, u Burusiya bumaze gutakaza abasirikare 104,560, ibifaru byabwo birenga 9,000, imbunda za artillery 2,004, imbunda zirasa misile za MLRS 423, misile zirasa ubwato 653, intwaro 212 zihanura indege, indege z’indwanyi 283 na kajugujugu 268.
Iyi ntambara yatangiye tariki ya 24 Gashyantare 2022. Nta muntu uzi amaherezo yayo kuko impande zombi ntabwo ziremeranya ku buryo zagirana imishyikirano.
