Ikigo gishamikiye ku Muryango w’Abibumbye giharanira iterambere rirambye, UNSDSN, ntabwo cyongeye gushyira u Rwanda muri raporo igaragaza uko ibihugu bihagaze mu byishimo.
Raporo ya 2020-2022 SDSN (Sustainable Development Solutions Network) yashyize ahagaragara kuri uyu wa 20 Werurwe 2023 yakorewe ku bihugu 137, rukaba ruyobowe na Finland imaze imyaka myinshi iza imbere.
Ibihugu byo mu karere ka Afurika y’iburasirazuba (EAC) biri kuri rutonde ni Kenya iri ku mwanya w’111, Uganda iri ku w’113, Tanzania iri ku w’129 na Repubulika ya demukarasi ya Congo iri ku mwanya w’133. U Rwanda, u Burundi na Sudani y’Epfo ntabwo birimo.
U Rwanda rwari rwaragaragaye kuri raporo ya 2021 yasohotse mu mwaka ushize, aho rwari ku mwanya w’143, imbere y’ibihugu bitatu byari ku mwanya wa nyuma.
Ntabwo SDSN yasobanuye impamvu hari ibihugu bitagaragara muri iyi raporo. Ku birimo Uganda, yashyizeho akamenyetso k’akanyenyeri (*), isobanura ko byatewe n’uko bitabonewe amakuru y’ubushakashatsi mu mwaka w’2022.
SDSN yagize iti: “Ibihugu bifite * ntabwo bifite amakuru y’ubushakashatsi bwo mu 2022. Ibigereranyo bishingiye ku bushakashatsi bwo mu 2021 no mu 2020.”
Iki kigo kandi gisobanura ko kuba inyuma cyangwa gusubira inyuma kw’ibihugu bimwe na bimwe kwatewe n’impamvu zitandukanye zirimo: intambara, icyorezo cya Covid-19, ihenda ry’ibiribwa n’ingaruka z’ibihe nk’imyuzure, inkangu, imiyaga iremereye n’ibindi.
