U Rwanda rugiye kongera umubare wa za kamera zo ku mihanda mu mujyi wa Kigali

441

Leta y’u Rwanda igiye gushora akayabo ka Miliyari zigera kuri 5 z’amafaranga y’u Rwanda mu kugura izindi kamera zo ku mihanda zizwi nka CCTV hagamijwe gukaza umutekano mu mujyi wa Kigali.

The New Times dukesha iyi nkuru ivuga ko iyi gahunda izashyirwa mu bikorwa guhera mu mwaka utaha, bikaba binateganyijwe ko aya mafaranga agomba kuzongerwa ku ngengo y’Imari izifashishwa muri uriya mwaka wa 2018/2019.

The New times ivuga ko mu kiganiro yagiranye n’Umuyobozi ushinzwe ibijyanye no guhanga udushya mu kigo gishinzwe ikoranabuhanga mu Rwanda, RISA, Sebera Antoine, yavuze ko aya mafaranga azagurwa kamera zigera kuri 124, zikazashyirwa ku mihanda hirya no hino mu mujyi cyane cyane ahakunze guhurira abantu benshi.

Uyu muyobozi kandi yavuze ko izi kamera zizafasha mu gutahura abanyabyaha ndetse no mu bikorwa bijyanye n’iperereza.

Yagize ati “Izi Kamera zizafasha mu gukumira ibyaha kuko abantu bazajya baba bazi ko polisi ibareba kandi iperereza rizoroha kuko hazajya hifashishwa amakuru kamera zatanze.”

Ubusanzwe, izi kamera za CCTV zikunze kwifashishwa mu maduka manini, amaguriro n’ahandi hantu hahurira abantu benshi batandukanye.

Abadepite batandukanye bari kwiga kuri uyu mushinga bashimangiye ko bazawushyigikira kuko bizafasha u Rwanda kugera heza rwifuza mu bijyanye n’umutekano.

Musubize:

Tanga igitekerezo
Andika amazina