U Rwanda rwamaze impungenge abatekerezaga ko Ubushinwa bushobora kuzajya bwumviriza ibikorwa na Minisitiri w’Intebe, Dr Edouard Ngirente binyuze mu nyubako baherutse guha u Rwanda.
Mu minsi mike ishize, Igihugu cy’Ubushinwa cyashyikirije u Rwanda inyubako ifite agaciro ka miliyoni 25 z’amadolari ya Amerika. Iyi nyubako izakoreramo Minisitiri w’Intebe n’izindi nzego za Leta.
Impungenge ziriho ni uko Abashinwa bagaragayeho akageso ko kubaka amazu, bagashyiramo utwumva dukurura amajwi mu ibanga rikomeye. Ibi byagaragaye mu mwaka ushize ko mu nyubako Abashinwa bubakiye Umuryango wa Afurika Yunze Ubumwe iri Addis Abeba muri Ethiopia.
Muri uyu muhango wo gushyikiriza u Rwanda iyi nyubako, Minisitiri w’Ibikorwa remezo, Gatete Claver yabajijwe n’abanyamakuru niba Abashinwa bataba barashyizemo uburyo bwo gukurikirana ibizajya bikorerwa muri iyi nyubako, abitera utwatsi.
Mu magambo ye ati “ Imirimo yo kubaka iyi nzu yagenzuwe n’itsinda ryo mu Rwanda n’Ubushinwa, bafatanyije. Igenzura twakoze ryatweretse ko ibyabaye muri Afurika Yunze Ubwumwe bitaba hano. Itsinda ryacu ryakurikiranye imirimo yose y’ubwubatsi.”
Iyi nyubako kandi si yo yonyine u Rwanda ruhawe n’Ubushinwa kuko n’ikorerwamo na Minisiteri y’Ububanyi n’Amahanga ari bo bayubatse. Haramutse harabayeho ukumvirizwa ku ruhande rw’u Rwanda, haba hamaze kugenda amakuru menshi.
[penci_related_posts dis_pview=”no” dis_pdate=”no” title=”Izindi nkuru wasoma” background=”” border=”” thumbright=”no” number=”4″ style=”list” align=”none” withids=”” displayby=”recent_posts” orderby=”rand”]
Si u Rwanda ruhawe iyi nyubako rwonyine muri aka karere, Uburundi nabwo buherutse guhabwa inyubako izakoreramo na bamwe mu bayobozi b’iki gihugu. Ibi byose biraterwa n’umubano mwiza Ubushinwa bufitanye n’ibi bihugu? Tubitege amaso.
Inkuru ya The Chronicles
