Igisirikare cya Repubulika ya Demukarasi ya Congo (RDC) kizwi nka FARDC cyashyirwaga ku rutonde rwa bimwe mu bisuzuguritse ku Isi, ahanini bitewe n’uko cyananiwe kurwanya imitwe yitwaje intwaro yashinze ibirindiro mu gice cy’uburasirazuba.
Gusa mu gihe gito gishize [nko ku butegetsi bwa Félix Tshisekedi], iki gisirikare cyagiye cyongererwa imbaraga, ku buryo hari raporo zihamya ko gisigaye gikanganye.
Muri izo raporo harimo iya Global Fire Index 2020, yagishyize ku mwanya wa 71 mu bindi 138 byo ku Isi. Ni mu gihe muri Afurika, FARDC iri ku mwanya wa 9 mu gukomera.
FARDC iri gutera imbere byihuse
Mu byatumye FARDC iza ku mwanya mwiza kuri GFI 2020 harimo umubare w’abaturage ifite, abasirikare ifite, ingengo y’imari igenerwa, ndetse n’umubare w’intwaro nini n’intoya gifite.
GFI 2020 igaragaza ko FARDC ifite abasirikare babarirwa mu 134,000. Ivuga ko iki gisirikare gifite indege zakwifashishwa mu ntambara zibarirwa muri 53, imodoka z’intambara zirenga 275, imbunda nini zigira amapine zirenga 16 ndetse n’izindi ziringaniye n’intoya. Ngo FARDC ifite amato y’intambara matoya 20 arimo 1 bushinzwe uburinzi bwo mu mazi (patrol).
Ingengo y’imari igenerwa FARDC ku mwaka, ibarirwa muri miliyoni 100 z’amadolari y’Amerika. Aya abarirwa muri miliyari 970 z’amafaranga y’u Rwanda.
FARDC yasinye amasezerano n’ibisirikare bikomeye ku Isi
Igitangazamakuru Actualite.CD cyo muri RDC, kivuga ko iki gisirikare cyasinye amasezerano y’imikoranire n’ibindi bisirikare bikomeye ku Isi, kuva Félix Tshisekedi yajya ku butegetsi muri Mutarama 2019.
Aya yiyongereye ku yo cyari gisanzwe gifitanye n’ibihugu nk’u Bushinwa busanzwe bugiha intwaro n’imyitozo, u Burusiya bugiha intwaro n’ibindi bikoresho birimo indege za Antonov.
Nko mu Gushyingo 2020, FARDC yasinye amasezerano n’igisirikare cya Leta Zunze Ubumwe z’Amerika, ajyanye n’imyitozo, itumanaho, gutanga isomo ry’ururimi ndetse no mu bya ‘engeneering’. Ibi byatangajwe n’Umuvugizi w’iki gisirikare, Gen. Maj. Richard Leon Kasonga.
FARDC kandi yasinye amasezerano yo kuvugurura imikoranire n’igisirikare cy’u Bufaransa kiri ku mwanya wa 7 mu bikomeye ku Isi. Aha kizajya giha abasirikare bayo imyitozo, kinabigishirize mu ishuri rya gisirikare riherereye mu mujyi wa Kinshasa.
Misiri ifite igisirikare cya mbere gikomeye muri Afurika, kikaba n’icya 9 ku Isi, nayo ku bwa Felix Tshisekedi yasinye amasezerano y’ubufatanye na RDC, ajyanye no kungurana ubumenyi mu bijyanye n’imyitozo ya gisirikare ndetse yemera no guhana intwaro.
Igisirikare cya Afurika y’Epfo kiri ku mwanya wa 29 ku Isi nacyo cyasinye amasezerano na FARDC, hiyongeraho ayo iki gisirikare cya RDC giherutse gusinyana n’icya Angola kiri ku mwanya wa 56 ku Isi, yakurikiwe n’akarasisi k’indege z’intambara z’ibihugu byombi kiswe ‘Meeting Aérien”, zarimo ubwoko bwa Mirage na Suckoi.
Imwe mu ndege zagaragaye muri Meeting Aérien
Uko FARDC igira imikoranire n’ibisirikare bikomeye ku Isi, ni ko nayo igira imbaraga zisumbuyeho, byagiye bigaragarira mu buryo yagiye yigaragaza muri operasiyo zo guhashya imitwe yitwaje intwaro iri mu burasirazuba, guhera mu mpera z’2019, aho abasirikare bicaga abarwanyi benshi, bafata mpiri bamwe, abandi bata ibirindiro. Ni ho abenshi batangiye kwibaza aho iki gisirikare cyaba gikura izi mbaraga, ubusanzwe cyari kizwi nk’igifite intege nke.
FARDC mu rugamba rwo kurwanya imitwe yitwaje intwaro
