Umuvugizi w’Ubushinjacyaha bw’u Burundi, Agnès Bangiricenge, yatanze ibisobanuro ku ntwaro zafatiwe mu rugo rwa Général de Police Alain Guillaume Bunyoni wabaye Minisitiri w’Intebe n’Umuyobozi Mukuru wa Polisi y’iki gihugu.
Mu kiganiro yagiranye n’abanyamakuru, hamwe n’abandi bavugizi b’inzego za Leta kuri uyu wa 13 Nyakanga 2023, uyu Muvugizi yavuze ko Bunyoni akurikiranweho ibyaha bitanu birimo gukoresha nabi umutungo w’igihugu, gutuka Umukuru w’Igihugu no gutunga intwaro mu buryo butemewe n’amategeko.
Bangiricenge yabajijwe uburyo byaba ikibazo kuba urugo rwa Bunyoni rwasangwamo intwaro kandi yari Général wari usanzwe afite abashinzwe umutekano bamurinda, asubiza ko uyu mugabo yari atunze izirenze izo yemererwa n’amategeko.
Yagize ati: “Mbabwiye gutunga intwaro adafitiye uburenganzira. Afite izo amategeko amwemerera ariko basanze n’izindi amategeko atamwemerera, bivuze ko azitunze atazifitiye uburenganzira.”
Abajijwe aho dosiye ya Bunyoni igeze, Bangiricenge yasubije ko Umushinjacyaha Mukuru yasabye urukiko kongerera urwego ayoboye igihe cyo gukora iperereza, asobanura ko kuri iyo mpamvu, uyu mugabo ufungiwe muri gereza ya Ngozi agikorwaho ipereza.
Bunyoni yatawe muri yombi muri Mata 2023 nyuma y’amezi hafi 7 akuwe ku mwanya wa Minisitiri w’Intebe. Hari hashize iminsi Perezida Evariste Ndayishimiye ateguje ko agiye guhangana n’igihangange gishaka kumukura ku butegetsi.
