Real Madrid yongeye gusubira Liverpool iyitsinda igitego 1-0 bituma ikomeza muri ¼ cy’irangiza mu mikino ya UEFA Champions League, mu gihe Napoli yo mu Butaliyani na yo yasezereye Eintrancht Frankfurt yo mu Budage.
Real Madrid yari yakiriye Liverpool kuri Estadio Santiago Bernabéu mu mu mukino wo kwishyura waje ukurikira uwo Real yabatsindiyemo iwabo ibitego 5-2 iturutse inyuma.
Umukino watangiye amakipe yombi akinira hagati mu kibuga adasatira bikomeye. Real yihariraga umupira ari na ko ishaka kumena ubwugarizi bwa Liverpool ndetse ibona koruneri nyinshi zitagize icyo zitanga.
Ku munota wa 13, Real yabonye uburyo bukomeye imbere y’izamu nyuma yo guhererekanya neza umupira wari uvuye muri koruneri, Vinicius Júnior ateye Alisson aratabara, umukino utangira kuzamura umuvuduko.
Ku munota wa 19, Camavinga yarekuye ishoti riremereye ku mupira yari ahawe na Nacho, ariko Alisson ashyiraho ikiganza umupira ugonga ipoto, mbere gato y’uko Modric na we atera ishoti ariko rikanyura hejuru y’izamu gato.
Ku munota wa 35, nyuma yo kugerageza uburyo 3 bworoheje, Cody Gakpo yarekuye ishoti rikomeye mu izamu, ariko Courtois aratabara ashyira umupira muri koruneri.
Igice cya mbere cyarangiye amakipe yombi akinganya 0-0, biha Real Madrid amahirwe yo gukomeza muri ¼ ku giteranyo cy’ibitego 5-2.
Ku munota wa 53, Federico Valverde yasize ba myugariro ba Liverpool ku mupira yari ahawe na Karim Benzema, ariko agize ngo atere mu izamu, Alisson Becker ararokora.
Kugera ku munota wa 60, Real Madrid yari yagerageje uburyo bw’igitego 12 ku buryo 8 bwa Liverpool.
Ku munota wa 63, amaze gucenga Trent Arnold umupira, Luka Modric yakaraze umupira mwiza imbere y’izamu, Federico Valverde agonga n’umutwe ariko umupira unyura hejuru gato y’izamu ‘petit filet’.
Ku munota wa 69, Vinícius Júnior yahaye Karim Benzema umupira mwiza imbere y’izamu gusa Benzema agerageje gutera mu izamu, umupira uca hejuru gato y’izamu.
Byasabye umunota wa 78 ngo igitego kiboneke
Ni nyuma y’uko Eduardo Camavinga yarekuye umupira mwiza maze Benzema awuha Vinícius Júnior nyuma yo kuwumusubiza aryamye ubundi agafungura amazamu, biba igiteranyo cya 6-2.
Real Madrid ikibona igitego, yahise ikuramo abakinnyi bayo bakuru barimo Karim Benzema, Luka Modric, Toni Kroos, Dani Carvajal na Vinícius Júnior maze yinziza mu kibuga abarimo Rodrigo, Tchouameni, Ceballos, na Lucas Vazquez; ibyatumye umukino ugenda gake.
Umukino warangiye Real Madrid iyoboye n’igitego 1-0, ndetse n’igiteranyo cy’ibitego 6-2 bituma ikomeza muri ¼ cy’irangiza mu mikino ya UEFA Champions League y’uyu mwaka.
Ku rundi ruhande, mu Butaliyani ku kibuga Diego Armando Maradoma, SSC Napoli yari yakiriye Eintracht Frankfurt maze iyinyagira ibitego 3-0, n’igiteranyo cy’ibitego 5-0.
Ibitego bya Napoli byatsinzwe na Victor Osimhen ku munota wa 45+2 n’uwa 53 na Piotr Zielinski ku munota wa 64 kuri penaliti, ibyatumye Napoli imeze neza uyu mwaka isanga andi makipe abiri y’i Milan mu Butaliyani muri ¼ cy’irangiza mu mikino ya UEFA Champions League.
Amakipe ya Real Madrid na SSC Napoli asanze andi makipe 6 yamaze gukatisha itike ya ¼ muri UEFA Champions League, ari yo AC Milan, Bayern, Benfica, Chelsea, Inter Milan, Man City.
Benzema na Vinícius Júnior bahoberana nyuma y’ubufatanye bwabyaye igitego
Mohamed Salah agerageza gucenga Rüdiger
Benzema akomeza kwigaragaza nk’inkingi ya mwamba muri iyi mikino
Victor Osimhen nyuma yo gutsinda igitego cyiza yahise aba Umunya-Nigeria wa mbere utsinze ibitego 2 muri ‘Knockouts’ za Champions League
