Mu Nama y’abaminisitiri muri Uganda kuri uyu wa Mbere ushize habereye guhangana gukomeye hagati ya minisitiri ushinzwe ibibazo by’imbere mu gihugu, Gen. Kahinda Otafiire ndetse na Minisitiri w’Intebe, Robinah Nabanja.
Gen Otafiire, amakuru ava muri guverinoma avuga ko ari umuntu ukunze kurangwa n’umujinya rimwe na rimwe, ngo yahinduye ururimi avuga Igiswahili maze yibaza ku mikorere ya Minisitiri w’Intebe.
Kuri urwo rwego nk’uko amakuru avuga, ngo Visi Perezida Jesca Alupo, wari uyoboye inama y’abaminisitiri yo kuwa Mbere kubera ko Perezida Museveni nta wari uhari, nawe ntiyabashije guturisha Gen. Otafiire nk’uko tubikesha Daily Monitor.
Uko byatangiye
Ibibazo byatangiye nyuma y’aho Nabbanja, watangaga igitekerezo cye ku rukingo rwa Covid-19, ashinje amakosa Minisitiri w’ubuzima, Dr Ruth Aceng, kubera inkingo nke za Covid-19 zafashwe mu gihugu anasobanura ko abantu benshi batikingije kubera ko abayobozi ba minisiteri y’ubuzima batarimo gufatana uburemere ikibazo cya Covid.
Dr Aceng yibukije Minisitiri w’Intebe ko ari we muyobozi wa Taskforce y’igihugu yo kurwanya iki cyorezo, kandi ko ibaruwa yanditse muri Mutarama kuri icyo kibazo yasubijwe muri Kamena.
Nyuma y’uko Dr Aceng asubije yirengera, visi perezida yahaye ijambo Gen. Otaffire ngo nawe agire icyo avuga ku mbogamizi ziri mu gukingira Covid-19.
Nibwo Gen. Otafiire yashinje Nabbanja kutorohera Dr Aceng n’abayobozi bo muri minisiteri y’ubuzima. Yasabye Minisitiri w’Intebe kwihanganira iryo tsinda anamwibutsa ko Covid-19 ari nshya kandi ibihugu byinshi bigihanganye no guhagarika iki cyorezo.
Ibi ngo byarakaje Nabbanja, asaba kumenya impamvu Otafiire atamukunda.
Minisitiri w’Intebe kandi yanashinje minisitiri Otafiire kumurwanya muri Kakumiro, aho atorera ndetse no muri guverinoma, avuga ko ashaka kumenya icyo yamukoreye.
Gen. Otafiire ntabwo yishimiye ibi nk’uko amakuru aturuka mu bitabiriye iyi nama avuga, aho bemeza ko yahise atangira guhonda ameza anasakuza mu Giswahili.
Mu gihe cy’iminota runaka ngo abandi ba minisitiri bari bacecetse ndetse na visi perezida.
