Impunzi 3 zo mu nkambi ya Rhino muri Uganda icumbikiye impunzi zaturutse muri Sudani y’Epfo zimaze gusiga ubuzima mu mirwano y’abafana mu gikombe cy’isi guhera ku itariki ya 17 Kamena 2018.
Ku mugoroba wo kuri uyu wa 19 Kamena, nibwo umurambo wa 3 w’impunzi yo muri iriya nkambi witwa Aleu Anei Aleu w’imyaka 32 wabonetse mu gihuru aho wari wajugunywe nk’uko byatangajwe n’umuvugizi wa polisi mu gace ka West Nile, Josephine Angucia.
Iyi mirwano yabaye ku cyumweru tariki ya 17 Kamena mu gace ka Tika ubwo izi mpunzi zarimo zireba umukino w’igikombe cy’isi ubwo hari hahuye amakipe ya Brazil na Switzerland.
Ni mu gihe abandi 2 na bo bari kwa muganga nyuma yo gukomerekera muri iyo mirwano.
Polisi ivuga ko hagikorwa iperereza kuri iriya mirwano mu gihe bivugwa ko bariya basore bo mu mpunzi baba bakigendera ku makimbirane yo mu miryango n’amoko yo mu gihugu cyabo bakaba ari byo bapfa bikitirirwa gufana.
Polisi kandi ikomeza ivuga ko ubwo yashakishaga abagize uruhare muri iyo mirwano, bagiye basanga bamwe bihishe mu bihugu bafite imipanga bityo bikaba bikekwa ko ari amakimbirane ashingiye ku moko akomeje kubakurikirana.
Ku munsi wo ku cyumweru tariki ya 17 hatoraguwe imirambo 2 ya Nabuk Jimak w’imyaka 50 n’umuhungu we Majok w’imyaka 18 bo mu bwoko bwa Dinka biciwe muri iyo mirwano.
