U Rwanda rwandikiye minisiteri y’ububanyi n’amahanga ya Uganda rusaba ibisobanuro ku itabwa muri yombi rya hato na hato ry’Abanyarwanda muri Uganda no ku makuru y’uko Kayumba Nyamwasa, umuyobozi wa RNC, arimo kwinjiza impunzi z’Abanyarwanda mu mutwe we wa gisirikare ushaka gutera u Rwanda, mu gihe Uganda yo ikomeje gushimangira ko umubano wayo n’u Rwanda wifashe neza.
Muri iyi baruwa yaturutse muri Ambasade y’u Rwanda muri Uganda, u Rwanda rwavuze amazina y’Abanyarwanda bafunzwe mu buryo batagira uwo bavugana ndetse na ambasade yabo muri Uganda itabasha kubageraho.
[xyz-ihs snippet=”google-pub”]
U Rwanda rukaba rwamaganye itabwa muri yombi ridasobanutse, kunanirwa kumenyesha ambasade y’u Rwanda iby’itabwa muri yombi ry’abo ihagarariye, no gufata nabi abaturage b’u Rwanda muri Uganda kuva mu mezi menshi ashize.
Muri iyi baruwa u Rwanda rwakomoje ku Banyarwanda bamaze gutabwa muri yombi mu buryo budasobanutse muri Uganda barimo; James Bayingana, Ali Lando Nshekanabo, Vianny and Byaruhanga Nduwamungu. Aba bakaba barafashwe muri Nzeri baza kurekurwa mu Ugushyingo 2017 hatari hazwi aho bafungiye.
U Rwanda kandi ruvuga Rene Rutagungira watawe muri yombi kuwa 27 Ukwakira ashinjwa ubushimusi no gucyura ku ngufu Lt Joel Mutabazi. Uyu nawe yaje kugezwa mu rukiko nyuma y’igihe hatari hazwi aho afungiye.
U Rwanda kandi rwakomoje kuri Fidele Gatsinzi uherutse gutabwa muri yombi kuwa 09 Ukuboza 2017, aho ruvuga ko yari yagiye muri Uganda gusura umuhungu we wiga Kaminuza ya Gikirisitu ya Uganda (UCU) ahitwa Mukono.
Bamwe mu bayobozi ba Uganda bakaba barabwiye Chimpreports ko Gatsinzi afitwe n’urwego rw’ubutasi mu gisirikare rumukekaho ibyaha by’ubutasi no kujujubya impunzi z’Abanyarwanda muri Uganda.
Ku ruhande rwa Uganda, Chimpreports ivuga ko yashatse kumenya niba minisiteri y’ububanyi n’amahanga ya Uganda yakiriye ibaruwa y’u Rwanda, igahamagara ushinzwe dipolomasi mu baturage muri iyi minisiteri, Margaret Kafeero avuga ko ari muri konji ntacyo yabivugaho.
Yohereje iki kinyamakuru ku Munyamabanga Uhoraho muri iyi minisiteri, Amb. Patrick Mugoya wemeje ko babonye iyi baruwa y’u Rwanda. Yagize ati: “Ni ukuri, ibaruwa yaraje”. Yongeyeho ko icyo bagiye gukora ari ukumva ubuyobozi butandukanye nyuma bakazabasha kugira icyo babivugaho.
Abajijwe kugira icyo avuga kuri iri tabwa muri yombi ry’Abanyarwanda u Rwanda ruvuga ko ridasobanutse, Mugoya yasubije agira ati: “Ntabwo turi abapolisi. Tuzashyikiriza ibyo bibazo abayobozi batange ibisobanuro.”
Yasabwe kugira icyo asobanura kuri iyi baruwa ayihuza n’ibintu bimaze iminsi bigaragaza ko bishobora guhungabanya umubano wa Uganda n’u Rwanda, asubiza ko umubano w’ibihugu byombi urenze kure iryo tabwa muri yombi ry’Abanyarwanda, akomeza agira ati; “Niba hari abakekwaho kugira uruhare mu byaha, bashobora gutabwa muri yombi.” Yakomeje ashimangira ko imibanire ya Uganda n’u Rwanda imeze neza.
Ku kibazo cya Kayumba Nyamwasa nacyo u Rwanda rwasabiye ibisobanuro, rwavuze ko ruhangayikishijwe no kuba Uganda ifasha mu gushaka abantu binjizwa mu nyeshyamba ndetse n’urujya n’uruza rw’Abanyarwanda mu karere bakoresha ibyangombwa by’inzira bya Uganda biganjemo abaturuka mu nkambi z’impunzi muri Uganda bagiye kwifatanya na RNC.
U Rwanda rukaba ruvuga ko rufite amakuru y’uko aka gatsiko k’abashaka kurutera gafite imigambi yo kuva muri Uganda, bakanyura muri Tanzania bakazasoreza urugendo muri Congo aho bivugwa ko hari inkambi z’imyitozo za RNC.
Nk’uko byavuzwe muri iyo baruwa, u Rwanda rukaba rwakomoje ku biherutse kuba kuwa 11 Ukuboza 2017 ubwo Abanyarwanda b’impunzi 40 bafatirwaga ku mupaka Uganda na Tanzania bagiye muri iyi myitozo muri Congo.
U Rwanda rukaba rwarahise rusaba iperereza ryimbitse vuba bishoboka kuri iki kibazo rigakorwa n’ibihugu kireba; u Rwanda, Uganda na Tanzania.
Amb. Patrick Mugoya akaba yavuze ko igisubizo cya Uganda ku Rwanda kizatangazwa nyuma y’ibizava mu iperereza rya minisiteri y’ububanyi n’amahanga ivugana n’abayobozi batandukanye bireba.
Yongeyeho ko ibi atari ngombwa ko byumvikana nk’aho umubano w’ibihugu byombi wifashe nabi ahubwo ari uburyo busanzwe ibihugu byombi bikoresha bivugana ku bitagenda.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
