Minisitiri w’umutekano wa Uganda, Maj. Gen. (Rtd) Jim Muhwezi, yategetse ko hakorwa iperereza ku makuru y’umugambi wo kwica Perezida w’Inteko Ishinga Amategeko, Anita Among .
Kuwa Kane ushize, Anita Among yabwiye inteko ishinga amategeko ko imodoka ye imaze iminsi ikurikirwa n’abantu batazwi.
Yagize ati “Iki ni ikintu namenyesheje gusa ukuriye abatavuga rumwe n’ubutegetsi mu nteko ariko ubu nshobora kubivuga ku mugaragaro. Nabonye raporo yo kwicwa…hari abantu bashaka kunyica,”
Iyi nkuru dukesha Chimpreports, ivuga ko kuwa Gatanu ushize Minisitiri Muhwezi na Minisitiri w’Intebe, Robinah Nabbanja, bahuye na Among mu biro bye.
Mu kiganiro bagiranye, Among yagaragaje impungenge z’umutekano we asaba Muhwezi kubikoraho iperereza.
Iyi nkuru ivuga ko ubusanzwe Among ari umuntu ubasha kugera kuri Perezida Museveni, hakaba hatumvikana neza impamvu aho kumwegera ngo amukemurire ikibazo yahisemo gusaba iperereza.
Gusa, ngo kuba Muhwezi ubwe yarasuye Among mu biro bye, birakuraho impuha z’uko yaba atabanye neza n’ubutegetsi.
Abavugaga ibi babihereye ku kuntu Among aherutse kugerageza guhagarika ibitaramo bya Nyege Nyege bizwiho gukorerwamo ubusambanyi bukabije, ariko abandi bategetsi ntibamushyigikire.
